நீர்ப்பிரதி

புல் புல்லால் ஆனது.

2010-04-08T19:20:00.005+05:30

இன்று எழுதவேண்டும் என தோன்றியது சரியாக எப்பொழுது எனத்தெரியவில்லை. தொட்டிச்செடிகளின் வேர்கள் சிறைபட்டிருக்கும் பிளாஸ்டிக் குடுவைகள் கோடை வெயிலுக்கு நெகிழ்வதை கண்ட நொடியில் அல்ல என்பது மட்டும் உறுதி. புழுதியில் விளையாடிய சிறுவனின் ஒழுங்கற்ற தலைமுடியைப்போல திசைக்கொன்றாய் நீண்டு கிடந்தது புல். ரோஜா செடியின் கீழ் புல். மல்லிகையின் கீழ், மரிக்கொழுந்தின் கீழ், இன்னமும் பெயர்தெரியா பல வண்ணச் செடிகளின் கீழ் விதவிதமாய் புற்கள். மலர்களுக்கான தோட்டம் மட்டுமல்ல அது ஆனால் தோட்டம் புற்களால் ஆனது எனும் வகையில் நீக்கமற அனைத்து தொட்டியிலும் நிரம்பிவழிகிறது.

எனக்கு புற்களை பார்க்கவே பிடித்திருக்கிறது. எப்போது மலரும் எனும் எதிர்பார்பின் அழுத்தம் இன்றி வளர்வதால் இருக்கலாம். தண்ணீர் ஊற்றியே ஆகவேண்டும் என்ற கட்டாயங்கள் இல்லை, அதனாலும் இருக்கலாம். ஆனால் அது புல் என்பதால் மட்டுமே என்பதே பொருத்தம். புல் தானாகவே வளர்கிறது. நாங்கள் தண்ணீர் ஊற்றூவதாலும் வளர்கிறது. செடிகளின் நீரை உறிஞ்சி, அதன் வேர்களை மூச்சுமுட்ட செய்கிறது எனும் குரல் வீட்டில் அடிக்கடி ஒலிக்கும். பரபரக்கும் விரல்கள் ஒரு நொடியில் அதை பிடுங்கி, சிதைத்து எறிந்துவிடும். கோபம் ஏதுமின்றி நான்காவது நாள் துளிர்விடும் இளந்தளிரின் குழந்தைத்தனம், நம்பிக்கை உங்களை மீண்டும் மீண்டும் புரட்டிப்போடும். நின்று அதை கவனிக்கும் ஒரு நொடியில் வாழ்வின் பொருளை இயல்பாக சொல்லிவிடும், மாலை காற்றுக்கு மெலிதாய் அசைந்தபடியே.

பூக்களை எங்கும் காணலாம்,எதுவாகவும் பார்க்கலாம். புல்லை புல்லாக மட்டுமே பார்க்க இயலும். எனவே பூவுக்காக பூ வளர்க்காமல் புல்லிற்காகவே புல் வளர்த்த கல்யாண்ஜி போலவே நீங்களும் ஒரு கவிதையை நீரூற்றி வளர்க்கலாம் நாள்தோறும். எத்தனை பறவை, எத்தனை பட்டாம்பூச்சி பார்த்தாலும் நமக்கு அது ஒரு பறவை, ஒரே பட்டாம்பூச்சி. அதுபோலவே புல்லும். விதம்விதமாக - பச்சை, சிவப்பு, வெளுப்பு, நீளம், உயரம், வேர் என எப்படி பார்த்தாலும், நாம் பார்ப்பதெல்லாம் ஒரே புல்தான்.

புல் புல்மட்டுமே அல்ல, பொருளும் பயனும் அற்ற பெருவெளியின் பண்முகத்தை நமக்கு வெளிப்படுத்தும் ஒரு ஒளிக்கீற்று. ஆதிமுதல் இன்று வரை அதே புல்தான். அதே விரல்கள் தான். அதே புறக்கணிப்பு தான். ஆனாலும் புல்லின் வாழ்க்கை புல்லால் ஆனாது. புல்லாகவே ஆனது. நாம் கவனிக்காத ஒரு நொடியில் நமக்கான ஒரு செய்தியை சுமந்தபடி, புல் புல்லாகவே சமைந்துவழிய, நாம் எதுவாவோ இருக்க முனைந்து எதுவாகவுமின்றி தொலைந்துபோகின்றோம்.

புல் எல்லோருக்குமானது. உங்களுக்கான புல் உங்கள் காலடியிலேயே காத்துகிடக்க, உங்கள் புல்லுக்கான நீங்கள் என்றுமே கண்டடைய முடியா சோகத்தை தன்னுள் புதைத்து, ஏமாற்றத்தின் குறிப்புகளின்றி தினமும் அசைகிறது ஒரு புல்.

ஒப்பாரியில் கரையும் சுகம்

2009-12-11T19:46:00.001+05:30

ஒப்பாரி மட்டுமே மனதிற்கு இதமளிக்கிறது. இதுவரை இழந்ததன் பாதிப்பில் மனக்குகை இடுக்குகளில் அடைபட்டிருந்த வலி மெல்ல மெல்ல கசிகிறது. மரணத்தின் நெடுவரலாற்றை கண்ணுற்ற என் நினைவேடுகளின் குறிப்பில் வெவ்வெறு ஓப்பாரிகள். இழப்பின் வாசத்தை தன் இதழ்களில் தேக்கி கதறும் ரோஜாமாலைகள், சமயத்தில் சாமந்தி, செண்டுமல்லி, சம்பங்கி சாவுக்கென அழகாய் அமைந்துவிடும் அந்த மாலைகள். சமபங்கிகளின் நீள்குழலில் தேனெடுக்க வரும் தேனீக்கள் சுமந்து செல்லும் தேனிலும் இழப்பின் வாசம் நிறைந்திருக்குமா?

வலியின் உக்கிரத்தை தூண்டும் பாடலொன்று எப்போதும் கசிகிறது என் புலன்களின் வழியே. கேட்கும் விருப்பமிருந்தால் துக்க அனுசரிப்பின் ஆயத்தங்களுடன் என் கதவை எப்போது வேண்டுமானாலும் தட்டுங்கள். உங்கள் ரணங்களுக்கு மெருகூட்டும் பாடலின் வரிகளை என் ஒப்பாரியின் கையேடு தாயாராகவே வைத்திருக்கிறது.

எந்த இழப்பிற்கென்று முன்முடிவுகள் எதுவுமின்றி மனம் ஒப்பாரியில் லயித்துவிடுகிறது . இனிவரும் இழப்புகளையும் கற்பனை செய்து ஒப்பாரி வைக்கலாம் வாருங்கள். வலியின் உச்சத்தில் உருக்கொள்ளும் இந்தப் பாடல்களின் வரிகளில் தோய்ந்திருக்கும் கண்ணீரைக்கழுவ முயன்று தோற்று முயன்று தோற்று கதறிக்கொண்டிருக்கிறது கடல். உலகின் வலிகளுக்காய் அழுதழுது பாரம் சுமந்தாலும், தகுதியான வலிகளுக்கென தனியாய் அழுவதை இன்றும் வாடிக்கையாய் கொண்டிருக்கிறது அது.

ஒப்பாரி வைக்க தனியான காரணங்கள் தேவை இல்லை. நம் இருப்பே அதற்கான தளம். முயன்று காரணம் வேண்டுமென நீங்கள் அடம் பிடித்தால் நேற்று மாலை உங்கள் தெருமுனையில் அடிபட்டு இறந்த நாய்க்குட்டியை நினைத்துக்கொள்ளுங்கள். உங்கள் வீட்டில் ஒண்டிக்கொள்ளலாம் என அது ஓடிவரும்போதெல்லாம் துரத்திவிட்டதன் துயரம் ஏற்கனவே இம்சித்துக்கொண்டிருக்கிறதல்லவா? அதை நினைத்து வருத்தங்கொள்ளுங்கள். மெல்ல உங்கள் விழிமடல் கசியும் கணமே ஒப்பரி உருக்கொள்ளும் நேரம். பாடியழுது விடுங்கள்.

ஒப்பாரியின் சுவையறிந்த பின் சும்மா இருப்பது சாத்தியமில்லை. அது ஒரு போதை. கரைபுரண்டோடும் கண்ணீரின் சூடு சுகமாய் உங்கள் மூளையின் சாம்பல அடுக்குகளில் பரவும்பொழுது நீங்கள் நிர்வாண நிலையுணரவும் வாய்ப்பிருப்பதால் உச்சவலியுணர்ந்து அழுகையை மீட்டிசுருதி கூட்டுங்கள். ஒப்பாரி ஆதியின் இசையாய் உங்களை சூழும் இந்தக்கணமே நான் கரந்துபோகும் நொடிகளாதலால், அடுத்த ஒப்பாரியின் கண்ணீர்வரிகளின் இடைவெளியில் மீண்டும் சந்திப்போ

இராசேந்திர சோழரின் உருவச்சிலை

2009-07-14T10:57:00.005+05:30

சோழவளநாட்டின் மீதான தீராக்காதல் நாடந்தாய் வாழி காவேரி என சங்ககாலம் முதல் கவிஞர்களின், அரசர்களின் கனவுத்ததேசமாய் சிறப்புற்ற தேசம். அணைகளின்றி கரைபுரண்ட அகண்ட காவிரியை இப்பொழுது நினைத்தாலும் மனம் சிறகுமுளைத்த தும்பியாய் அந்தப்புனலில் நீராடி மகிழ்வுறும். காவிரிக்கரை தந்த இலக்கியமும், ஆட்சிமுறைகளும் வீரமும் வரலாற்றின் பக்கங்களில் தனிக்கவனத்தை பெற்று நிகரில்சோழம் என்பதை உறுதிசெய்வது.

காவிரி தோன்றிய காலந்தொட்டே சோழர்கள் அதன்மீது தனிக்காதல் கொண்டவர்களாக இருந்திருக்கவேண்டும். கரிகாலன் - கல்லணை- காவிரி இன்றும் ஓர் தீராக்காதல் கதை. அந்தச்சோழ வரிசையில் ஒப்பாரும் மிக்காரும் இல்லா பெரும்புக

ழ் கொண்ட ஓர் அரசன் உதித்தானென்றால் அது ராசேந்திர சோழன் மட்டுமே. கடல்கடந்து தேசங்களை தன் காவிரிதேசத்துடன் இணைத்த இணையில் சோழ அரசன் அவர்.

கங்கையை கொண்டுவந்து சோழபுரத்தில் அமர்த்தி, கங்கைகொண்ட சோழபுரத்தை படைத்தவன். தன் தந்தைக்கு தஞ்சை என்றால், தன் பெயர் சொல்ல ஒரு நாட்டை உருவாக்கி அங்கிருந்து அடுத்த 200 ஆண்டுகள் சோழ பரம்பரை ஆட்சி புரிய அடித்தளம் இட்டவன் இராசேந்திரன். தமிழக அலெக்சாந்தர் என்றால் அவன் மட்டுமே. அலெக்சாந்தரும் கடல் கடந்து போர் புரிந்தது இல்லை. பகை அஞ்சும் தகை சால்பு ஒன்றே அரசனின் தனிச்சொத்து, அதன் முழு உருவம் ராசேந்திரன்.

தெற்கு என அந்நாளில் அறியப்பட்ட ஒட்டுமொத்த நிலப்

பரப்பும் ராசேந்திரனின் கீர்த்தியை பாடி நின்றது. கங்கைகொண்ட சோழபுரத்து கோவில் எனும் அழகிய கலைப்பொக்கிசத்தை நமக்கு விட்டுச்சென்ற கலைரசிகன். அந்தகைய தகைசான்ற தமிழனின் சிலை, இன்றைய கர்நாடக கோலாரில் இருக்கிறது என்ற செய்தியை கேட்டபின்பு நிலைகொள்ளவில்லை எனக்கு. உடனே வண்டியை கிளப்பிவிட்டோம் கோலாரை நோக்கி.

பெங்களூரில் இருந்து 70 கீமி, பழைய சென்னை ரோட்டில் அமைந்து இருக்கிறது கோலார். தங்கத்துக்கு பெயர்போன கோலார் தான். ஊர்க்கோடியில் கோலாரம்மா கோயில் அரசு தொல்பொருள் துறை வசம் உள்ளது. கோயிலை பார்த்த உடன் ஒரு குதூகலம் எங்களை சூழ்ந்து கொண்டது, ஏனெனில் அது ஒரு சோழக்கோயில். சோழர்களின் கையெழுத்து படைப்பான “மொட்டை கோபுரம்” நம்மை வரவேற்கிறது

நுழைவாயில் பெருந்தூணை பிற்கால கிருஷ்ணதேவராயன் அலங்கார வேலைப்பாடுகள் செய்து சிறப்பித்துள்ளார். அதில் அவரின் சிலை ஒன்றும் இருக்கி

றது. மொட்டை கோபுரம் தாண்டியதும் கொடிமரம் அப்புறம் பலிபீடம். அதன் பின்பு சிறு தூண் கொண்டு நிறுவப்பட்ட மண்டபம் அல்லது திண்ணை போன்ற அமர்விடம். அந்த தூணில் சேனாவதி சோழசோழ சோழியவரையன் என்று எழுதப்பட்டு இருக்கிறது.

உள்ளே நுழைந்தால் இரண்டு கருவறை- ஒன்று கிழக்கு நோக்கி ஒன்று வடக்கி நோக்கி. கோவில்ன் சுவர்களெங்கும் அங்கிங்கெனாதபடி கல்வெட்டுகள். கருவரையின் பின்புற சுவற்றில் இருந்து கல்வெட்டு ஆரம்பிக்கிறது “ திருமன்னி வளர இருநிலமடந்தையும் போர்செயப்பாவையும்” என மிகப்புகழ்பெற்ற ராஜேந்திரரின் மெய்கீர்த்தி ஆரம்பிக்கிறது.

கருவறைக்குள் நுழைய பக்திமான் போல நடிக்க வேண்டியதாயிற்று. :). உள்நுழைந்ததால் கிடைத்த மற்றொரு பரிசு, கருவறக்கு நேரெதிரே ஒரு தூணில் ராசேந்திரரின் மெய்கீர்த்தி. 70 வரிகள் கொண்ட ராசேந்திரரின் மெய்கீர்த்தியில் முழுதும் இடம்பெற்றீருப்பது முழுவதும் அவர் வெற்றிகொண்ட நாடுகளே எனில் அந்த பேரரசனின் தீரம் எத்தகையதாக இருந்திருக்கும்?

இனி புகைப்பட ஆவணம்.

ராசேந்திரனின் போர்க்கோலக்காட்சி அவரின் தீரத்தை வீரத்தை கல்லில் வடித்து காலத்தில் சமைத்துவிட்டது. ராசேந்திரனின் சிலையை கங்கைகொண்ட சோழபுரத்திற்கு இடம் மாற்றினால் மிகவும் பொருத்தமாக இருக்கும். ராசேந்திரரின் ஆட்சிக்காலத்தில் பிடரி என்றழைக்கப்பட்ட கோலாரம்மா கோயிலுக்கு அளிக்கப்பட்ட தானம் குறித்த கல்வெட்டு கோயில் முழுவதும் வரிகளாய் வழிகிறது.

பெங்களூரில் இருக்கும் ஆர்வலர்கள் சென்று கண்டு களிக்கலாம். மிகவும் குறைவான தூரம்-2மணி நேரத்தில் கோலாரை அடைந்து விடலாம். சாலையும் நன்றாக இருக்கிறது. ராசேந்திரனின் மெய்கீர்த்தி சொல்வது போல் போர்செயச் செல்வி அவர் வாழ்நாள் முழுவதும் அவருக்கு துணை இருந்ததால், தோல்வியை கண்டறியா உலக போர்ப்படை தலைவர்களின் வரிசையில் ராசேந்திரரின் பெயரும் இடம் பெற்றிருப்பது ஒரு சிறப்புச்செய்தி.

கறுப்பி

2009-06-19T14:30:00.004+05:30

மாடியில் தோட்டம் போட்ட நாள் முதல் அவள் எப்போதும் அங்கேயே கிடந்தாள். இந்த முனை முதல் அந்த முனை வரை தொட்டியில் பூத்துக்குலுங்கும் ரோஜா, மல்லி மற்றும் பெயர்தெரியா பல பூ வகைகளின் மீது பறந்து பற்ந்து காவல் புரிவது கறுப்பியின் அன்றாட வேலை. அவளின் மகிழ்சிக்காகவே பூக்கும் தாவரங்களை தோட்டத்தலில் சேர்க்க ஆரம்பித்து விட்டோம்.

கடந்த 4 மாதமாக பார்க்கிறேம், எப்போதும் அதே சுறுசுறுப்பு, மகிழ்ச்சி, ரீங்காரம், பூக்களின் மீது நீங்காத காதல், எங்களுக்குள்ள குறை என்னவென்றால், பெரும்பாலான பூக்கள் தேன் தரும் வகையை சார்ந்ததில்லை எனினும் அவள் பூ மீது தான் அமர்ந்திருப்பாள். அவள் என்பதை அவள்

கட்டிய கூட்டை வைத்து தான் முடிவுக்கு வந்தோம்.

எப்போது தோட்டத்திற்கு போனாலும், தன் இருப்பை பறந்து பறந்து வெளிப்படுத்துவாள் கறுப்பி. இந்த முனையிலிருந்து அந்த முனை வரை ஒரு வட்டமடித்துவிட்டு நான் எங்கு நின்று கொண்டிருக்கிறேனோ அங்கிருக்கும் செடியின் பூ மீது அமர்ந்து கொள்வாள். மறந்தும் இலைகள் மீது அமர்வதில்லை. எப்போதும் பூ தான். தோட்டத்திற்கு போகையில் அவளைக்காணாவிட்டால் மனம் சங்கடப்படும்.

நட்பு பாராட்டுவதில் மிகவும் விருப்பு கொண்டவள். அதீத உற்சாகத்தில் சில நேரம் தோள்மீது வந்தமர்வாள். செடிகளுக்கு நீர் விட நேரமாகிவிட்டால், வீட்டுக்குள் வந்து வந்து வட்டமடிப்பாள். உடனே செடிகளுக்கு நீர்விடுவோம். நீர்விட்டதும் ஓவ்வொரு செடிக்கும் பறந்து சென்று நலம் விசாரிப்பாள், தன்னால் தான் நீர்விடப்பட்டது என மௌன மொழியில் சொல்வாள்.

அவள் வந்த நாள் முதல் அவளை பதிவு செய்ய முயன்று இன்று தான் நேரம் வாய்த்தது. கறுப்பி எத்தணை நாள் எங்களுடன் இருப்பாள் என தெரியவில்லை. ஆபத்துகள் சூழ்ந்த இந்த உலகில் ஒவ்வொரு நிமிடமும் நிலையாமைதான். என்றாலும் அவளின் ரீங்காரங்கள் இந்த தோட்டத்து உயிர்மையில், எங்கள் நினைவுகளின் நீட்சியாகிப்போன ஒன்று.

இந்த தோட்டம் அவளுடையது என்ற மகிழ்ச்சி எப்போதும் அவளின் சிறு இறகுகளின் துடிப்பில் வெளிப்படும். எந்த ஒரு பூச்சியோ, மற்ற குளவிகளோ இங்கு வந்துவிட உத்தரவில்லை, அதை துரத்திவிட்டுதான் மறுவேலை பார்ப்பாள் கறுப்பி. ஒரே ஒரு மஞ்சள் கறுப்பு புள்ளி பட்டாம்பூச்சி மட்டுமே வந்து செல்ல அனுமதி உண்டு, அது கறுப்பியின் நண்பி போல.

தமிழ்மணம் - நட்சத்திரம் - சில பதில்களும், பக்க வினையும்

2009-06-16T11:11:00.004+05:30

தமிழ்மண வானத்தில் வாரம் ஒரு நட்சத்திரம் மின்னுவதும், வெகு அரிதாக மீள்நட்சத்திரங்கள் புத்தொளி வீசுவதும் நடந்தேறிவருகிறது. மீள்பதிவர்கள் குறித்த முரளிகண்ணனின் பதிவு இது. அவரது கேள்விக்கான சில பதில்களையும், பக்க வினை (எதிர்வினை-நேர்வினை அயர்ச்சியளிப்பதால் இந்த பக்க வினை- யார் பக்கம் என நீங்களே பக்கம் பக்கமாக எழுதி கல்லா கட்டலாம்).

புள்ளிவிவரங்களை அள்ளி தெளித்திருப்பதிற்கு முரளிக்கு நன்றி, மேலும் நட்சத்திர வார தகுதிநிலைக்கு அவர் தரும் மரியாதையும் இயல்பான ஒன்றே. புதியவர்களுக்கான நட்சத்திர வாரம் என்பது இயல்பான ஒன்று. வாரம் ஒரு புது பதிவர் இயல்பாகவே மேடை ஏறுவர். காலங்காலமாக(!)) எழுதிக்கொண்டிருக்கும் ஆரம்பகால பதிவர்களை மீண்டும் மேடையேற்றுவதென்பது, எம் எஸ்வி மற்றும் இளையராஜா பாடல்களை மீளிசையாக்கம் செய்வது போல.

சுருங்கச் சொன்னால், 80 -90 என பழைய படங்களின் பெருமைகளை மற்றவர்கள் அறியத்தரும் உங்கள் நல்லெண்ணம் போலவே தமிழ்மணமும் செயல்படுகின்றதென நினைக்கிறேன். மேலும் தொடர்ந்து எழுதிவருகையில் தமிழ்மண நட்சத்திர ஒளிவட்டம் மீண்டும் நம் மீது விழும் என பதிவர்களுக்கு ஒரு ஊக்கமும் இருக்கும். ஆறு வருடத்தில் மோகன்மீது இது இரண்டாவது முறை- ஏறக்குறைய முதலமைச்சர் பதவி போல. :)

தினமும் நூற்றுக்கணக்கானோர் இணையும் இந்த வெளியில், பழைய பாடல்களையும் ஒலிபரப்பி ஒரு Vintage எண்ணக்கிளர்ச்சியை பதிவர்கள் மனதில் ஏற்படுத்துவது ஒரு நல்ல செயலே. எழுதுவதின் அயர்ச்சி அனைவரும் அறிந்ததே. மிகவும் தீவிரமாக எழுதுபவர்கள், எழுத்தின் நீளஅகல பரிமாணங்களை தொட்டுவிட துடிக்கும் சில எழுத்தாளர்களை இந்த அயர்ச்சி விரைவில் கவ்வும்.

அந்த அயர்ச்சியிலிருந்து ஒரு நல்ல எழுத்தாளனை, பதிவரை மீட்டெடுக்கும் செயலாகவே ஆசிப் அண்ணாச்சி மற்றும் மோகனின் மீள்தெரிவுகளை பாவிக்கிறேன். இதை அரசியல் நோக்கோடு அனுகுவது அந்த பதிவரை காயப்படுத்தும் கீழ்த்தரமான நோக்கமாகவே இருக்கிறது ( இந்தக் கேள்வியை நீங்கள் அவரிடம் கேட்கவில்லையா? இல்லை அவர் உங்களுக்கு தவறான தகவலை தந்தாரா?) இப்படி கேட்டுவிட்ட பின்பு நானும் அவரின் ரசிகன் தான் என சப்பைகட்டு எதற்கு.

ஒரு எழுத்தாளனக்கு எத்தனை முறை மரியாதைகள் வந்தாலும் அதை நாம் வரவேற்று மகிழவேண்டும். இருக்கும் பதிவர்களும் 14 ஆண்டுகள் தொடந்து எழுதுவார்கள் என எதிர்பார்க்க இயலாது. நாம் எழுத ஆரம்பித்த காலத்தில் எத்தனையோ பதிவர்கள் அலையெழுப்பி காணாமல் போய்விட்டார்கள்.

மீள் வாய்ப்பென்பது, பதிவுலகின் எத்தனையோ உள்குத்து, முதுகு சொறிதல், குழு கும்மி என அனைத்தையும் தாண்டி இன்னமும் பொட்டி தட்டும் அவர்களின் மனதைரியத்தை பாராட்டியே வழங்கப்படுகிறது என நினைக்கிறேன். :).

உங்களின் வேண்டுகோள் உண்மையாகவே வேறுபரிமாணம் அடைய வேண்டுமென்றால், விரைவு நட்சத்திர வாரங்கள் கடைபிடிக்கப்பட வேண்டுமென தமிழ்மணத்தை கேட்கலாம். உங்களின் கணக்குப்படி ஒரு பதிவர் வாரத்து நாலு பதிவுகள் எழுதுகிறார் என்றால் அவரை அதை இரண்டு நட்சத்திர நாட்களில் பதிவேற்றிவிட்டு மகிழ்ச்சியாக கடையை காலி செய்யச் சொல்லலாம்.

வாரம் என்பது தான் இங்கு Constraint, எனவே அதை இரண்டு தினங்களாக சுருக்கி பல பதிவர்களை மேடையேற்றலாம். ஒரு வாரம் என்றாலும் அவர்கள் பதிவேற்றுவது நாலோ ஐந்தே பதிவுகளே. எனவே மீள்பதிவர்களை கும்முவதை விட்டு, அமைப்பை மாற்றுமாறு கோருவோம், அதுவே பல நட்சத்திரங்கள் சுடர்விட்டு பிரகாசிக்க ஏதுவாக இருக்கும். இது +பக்கவினை.

மீள் நட்சத்திரங்களை கும்முவது தேவையற்ற மனக்கசப்புகளை ஏற்படுத்துவதோடு மட்டுமன்றி, மற்றவர்முன் நீங்கள் நீங்கள் -veபக்கவினையாக தெரியும் சங்கடங்களையும் உருவாக்கும்.

பெய்யெனப் பெய்யும் தமிழ்த்துரோகம்

2009-06-06T18:29:00.004+05:30

நம்பிக்கையின் அடிப்படையில் அமையும் உறவுகள், அதன் எதிர்நிலையான துரோகத்தின் வாசத்தை எப்போதும் சுவாசித்துக்கொண்டுதான் இருக்கிறது. கண்ணாமூச்சி ஆட்டத்தில் காட்டிக்கொடுக்கும் நண்பனிலிருந்து துரோகம் பல்வேறு நிலைகளில் வாழ்வாதரங்களை, மனிதம் மீதான நம்பிக்கையை அடியோடு சீர்குலைக்கிறது.

எதன் அடிப்படையில் ஒருவன் துரோகி என அழைக்கப்படுகிறான்? எந்த ஒரு அதிசய நொடியில் அவன் துரோகியாகிறான்? வரலாறு முழுவதும் துரோகத்தால் உருவாக்கப்பட்ட பக்கங்களே அதிகம். வெற்றிகள் துரோகத்தின் பின்புலத்திலேயே கட்டமைக்கபப்டுகிரது. அலெக்சாந்தர், சீசர், கிளியோபாட்ரா, யேசு முதல் எட்டப்பன் என வரலாற்று துரோகங்களின் அடிச்சுவடியை படித்து வளரும் மக்கள் கூட்டம் எப்போதும் துரோகத்துக்கான வாய்ப்புகளை தேடியலைகிறது.

தனிமனித துரோகம் சீர் குலைக்கும் ஒரு குடும்பத்து கனவுகள், ஒரு சமுதாயத்தை ஒழிக்கும் சிலரின் துரோகம், ஒரு நாட்டை அழிக்கும் சில தலைவர்களின் துரோகம், ஒரு இனத்தை அழிக்கும் பேரினவாத துரோகம் என அனுதினம் நமைசுற்றி நிகழும் துரோகங்கள் நமை அச்சங்கொள்ளச்செய்கிறது. வரும் தலைமுறைக்கு எடுத்துச் சொல்லுமளவுக்கு தலைமைப்பண்புகள் கொண்ட தலைவர்கள் வரலாற்றில் மிகக்குறைவே.

துரோகத்தால் வீழ்த்தப்பட்ட வீரனின் துயரங்களை சுமந்தழுத கண்ணீர்தான் பெருக்கெடுத்து கடலாகி உலகை கரைத்துக்கொண்டிருக்கிறது. நம்பிக்கையின் அடிப்படையை தகர்க்கும் இத்தகைய துரோகத்தின் வரலாற்றை, அதன் இழிவை வரலாற்று காலந்தொட்டு எடுத்துரைத்த ஒரு இனம் இருக்குமென்றால் அது தமிழினம்தான். இந்திரர் அமிழ்தம் இயைவதாயினும் இனிதனெ தமியியர் உண்டலும் இலரே என்ற அடிப்படையில் கட்டமைக்கப்பட்ட தமிழினத்தில் இப்பொழுது துரோகங்கள் பெய்யெனப்பெய்கிறது.

பழியென்றால் உலகுடன் கொடுத்தாலும் வேண்டாமென சொல்லும் தமிழினம் செத்து எத்தனை நூற்றாண்டுகளாயிற்று என தெரியவில்லை. மனம் இனங்கொள்ளாமல் வலிக்கிறது. உண்பது நாழி, உடுப்பது இரண்டே.... இந்த பீத்தவாழ்விற்கு ஏன் இத்தனை முட்டாள்தனங்கள் என தெரியவில்லை. இதுவரை துரோகத்தால் நீங்கள் கொன்ற மனிதத்தின் நிலையை, அதன் வலிகளை மௌனமாக ஏற்றுக்கொண்டவனை ஒரு நொடியேனும் நினைவில் நிறுத்துங்கள்... ஒரு பேராண்மை மிக்க இனம் இவ்வளவு தரந்தாழ்ந்து போனதின் காரணம் என்ன?

தமிழினன் இல்லாத இடம்பார்த்து குடியேறும் என்போன்ற தமிழர்களின் நம்பிக்கைகளை சீர்குலைத்தது இந்த தமிழினத்தின் பெருவெற்றியா? உலகெங்கும் இனங்கள் தங்கள் இனநலனை மட்டுமின்றி உலகமனிதத்தன்மையின் மீதான பெருவிருப்புடன் இயங்கி முன்னேறுகையில் தமிழன் மட்டும் துரோகியென உலகெங்கும் கீர்த்துபெற்று உலாவருவது எங்கனம்? தமிழர்களை மட்டுமின்றி அகப்படுபவர்களுக்கெல்லாம் துரோகமிழைத்து அதை இன அடையாளமாக்கிவிட்டது நமது பெருவெற்றி?!.

பெரும்பாலான சாம்பல்களில் கமழ்ந்து வேகுவது தமிழ் இல்லை... அதன் அடையாளமாகிய துரோகமே... அற்ப சுகங்களுக்காய் மனிதத்தன்மையை விற்று மலம் புசிக்கும் துரோகிகளின் நெடுவரலாறாகிவிட்டது தமிழனின் துயரப்பக்கங்கள். தமிழனென தெரிந்தால் தேடிவந்து ஏமாற்றி, துரோகமிழைத்து வாழ்வை ரணகளமாக்கும் நல்லிதயங்கொண்ட தமிழர்களே.. இனியும் தாங்கும் திரணியில்லை. நாங்கள் தமிழர்களே இல்லை... எங்களை விட்டுவிடுங்கள்.. துரோகிகளின் இனமாகிவிட்ட தமிழினத்தை நான் மறுதலிக்கிறேன். காதலாய் கசிந்துருகி கண்ணீர்மல்கி நான் தொழுமளவிற்கு தோன்றிய ஒன்றிரண்டு தலைவர்களின் நினைவுகளை மட்டும் எனக்கான கலங்கரைவிளக்காமாய் என் நெஞ்சில் ஏந்தி, இந்த தமிழினத்தை மறுதலிக்கிறேன்.

யூதாஸ் மூன்று முறை என்றால், நான் என் விழிமூடி மண்ணில் சாயும்வரை நான் தமிழனென்பதை மறுதலிக்கிறேன். இது ஒரு கேடுகெட்ட இனம். இதுவரை மானமுள்ள தமிழனாகவே வாழ்ந்து மடிந்தவர்களுக்கு என் வணக்கங்கள். உங்கள் வலிகளுக்கு, தியாகங்களுக்கு, எதிர்கொண்ட சிறுமைகளுக்கு தலைசாய்க்கிறேன். போராட்டம் துரோகிகளுக்கானதல்ல.

திமுக - அதிமுக இணையவேண்டும்

2009-06-01T08:42:00.005+05:30

மத்திய கட்சிகள் இனி பெரும்பான்மை பெறும் இச்சூழலில், மாநில கட்சிகளின் தேவை குறையத்தொடங்கும் இந்தச்சூழலில் பெரிதும் பாதிக்கப்படுவது மாநில நலனே. நாற்பது தொகுதிகளும் ஒரு குடையின் கீழ் வருகையில் Bargaining Power அதிகமாகிறது. மத்தியில் கூட்டாட்சி, மாநிலத்தில் சுயாட்சி என கடந்த 10 ஆண்டுகளாக புதுபரிமாணம் கண்ட அரசியல் களன் ஏனோ மாறிவருகிறது. அதற்கான காரணங்கள் பலவாக இருக்கலாம்- மாநில கட்சிகளின் முதிர்ச்சியின்மை, சுயதேவைகளை முன்னிறுத்தல், கூட்டாட்சி செயல்பாடு குறித்த தெளிவின்மை என இது நீளும்.

உண்மையான கூட்டாட்சி அந்தந்த மாநிலக் கட்சிகளின் பலத்தை பொறுத்து அமைகிறது. மத்திய கட்சிகளின் முதுகில் சாவாரி செய்வதை விடுத்து கட்சிகள் தத்தம் மாநிலத்தில் தன் வீச்சை அதிகரிக்கும் முயற்சிகளை மேற்கொள்ளவேண்டும். பெரும்பாலான மாநிலங்களுக்கு மாநில கட்சிகளே இல்லை என்பது வெட்கக்கேடு. காங்கிரசும்-பிஜேபி’யும் ஆந்திரா-கேரளம், கர்நாடகா வரை வந்துவிட இன்னமும் எதிர்த்து நிற்கும் ஒரே மாநிலம் தமிழகம் மட்டுமே. அங்கொன்றும் இங்கொன்றுமாக ஒரு சில மாநில கட்சிகள் முன்னேறினாலும், ஒட்டுமொத்த மாநிலத்தின் தொகுதிகளை முழுமையாக வெல்லும் திறன் கொண்ட கட்சிகள் மிகவும் குறைவே.

இந்த சூழலில் 20 உறுப்பினர்களை வைத்துக்கொண்டு நாம் எதையும் சாதிக்க நினைத்தால் அது நடப்பது மிகவும் கடினம். காங்கிரசுடன் கூட்டு வைப்பதற்கு அதிமுக’வுடன் கூட்டு வைக்கலாம். இது ஒட்டுமொத்த 40 தொகுதிகள் ஒரு கூட்டணியின் கீழ்வருகையில் காங்கிரஸ்-பிஜேபி என்பது ஒரு எம்-எல்-ஏ தொகுதியில் கூட வெற்றிபெற இயலாமல் தோற்கும். ஆரிய-திராவிட என முக்கிமுனகி அறிக்கை குடுத்து பயனில்லை. தொலைநோக்கு பார்வையுடன் அடுத்த தலைமுறைக்கான மாநில நலன்களை காக்கும் முயற்சியில் நமது திராவிட கட்சிகள் முன்வர வேண்டும்.

மத்தியில் கூட்டாட்சி என முழக்கமிடும் தலைவர்கள் மாநிலத்திலும் அதை செயல்படுத்தலாம். தனிமனித விருப்பு வெறுப்புகளுக்கு ஒரு முடிவு கட்டி, மாநில நலனை மத்திய அரசின் புறக்கணிப்பில் இருந்து மீட்டெடுக்கும் பரந்த பார்வையுள்ள தலைவர்களே நமக்கான இன்றைய தேவை. மத்திய கட்சிகள் பெரும்பான்மை பெறுகையில் வடக்கு-தெற்கு பாகுபாடு- ஆரிய - தமிழிய பாகுபாடு இயல்பாக உயிர்பெறுகிறது. அதை வென்று நமக்கான பங்கை பெறுவது எண்ணிக்கையில் தான் உள்ளது.

திராவிட கட்சிகள் என கூப்பாடு போடும் இந்த கட்சிகள் தென்மாநிலங்களுடனான உறவில் என்றுமே ஒரு சுமூக நல்லுறவை வளர்ததில்லை. கொள்கையளவிலான உடன்பாடு தென் மாநிலக் கட்சிகளுக்கிடையில் ஏற்படுகையில்- வடக்கிற்கு அது ஒரு சமநிலையை ஏற்படுத்தும். மிகவும் வளர்ச்சியடைந்த தென்மாநிலங்கள் ஒரு ஒத்துழைப்பு குழாமிற்குள் வருவது காலத்தின் கட்டாயமாகிறது.

இதே சுயதேடலில் கம்யூனிஸ்டு கட்சிகளும், கர்நாடகத்தின் தேவேகௌட கட்சியும், ஆந்திரத்தின் தெலுகுதேசமும், சிரஞ்சீவியின் எழுச்சியும் கணக்கில் கொண்டு காய்நகர்த்தலில் ஈடுபடவேண்டும். மாநிலத்தை குறித்த கவலை தேவையற்றதாகிறது அதிமுகவும்-திமுக’வும் ஒன்றாகையில். எனவே பிறமாநில அரசியலில் சற்று கவனம் செலுத்தி கூட்டணிகளை வளர்த்தெடுப்பது அவசியம். தேர்தல் நேரத்தில் மட்டும் மேடையேறுவது சுயநலவாதமாக மட்டுமே பார்க்கப்படுகிறது.

இந்த கட்டமைப்பில் விஜயகாந் முதலிய சிறுகட்சிகள் வாக்குச்சிதறலில் ஈடுபடுவது குறையும். தமக்குள் குவிந்து கிடக்கும் முப்பது வருட குப்பயை சுத்தம் செய்ய அதிமுக’வும் திமுக’வும் முன்வரவேண்டும். மத்திய அரசில் தேவைகளை ஜெ’வும் மாநில ஆட்சியை திமுக’வும் ஏற்றுக்கொண்டு அடுத்த 20வருடங்களுக்கான அரசியல் பாதையை-வளர்ச்சியை-மாநில முன்னேற்றத்தை சீரிய பாதையில் செலுத்த வேண்டும்.

காவிரி முதல் முல்லையாறு உட்பட பாலாறு என அனைத்து விதத்திலும் நமக்கு பின்னடைவே. அதில் முதன்மையானது ஈழம் மற்றும் சேதுசமுத்திரம் மற்றும் கச்சத்தீவு விவகாரத்தில் தமிழக்த்திற்கு இழைக்கப்பட்ட அநீதிகள். இவற்றையெல்லாம் களைய, ஒரே குரலில் ஒலிப்பது அவசியம். பிளவுபட்டு நிற்கையில் ஒரே குரலை எதிர்பார்க்க இயலாது, கட்சிகள் ஒன்றுபட்டால் மட்டுமே அது சாத்தியம்.

இது ஒருவித தத்துவார்த்த-கனவியல் வாதம் என்றாலும் அதற்கான முன்னெடுப்புகளை ஆரம்பிக்கவேண்டிய கட்டத்தில் தமிழகம் இருக்கிறது, ஏனெனில் மத்திய கட்சி இன்னமும் தகர்க்க முடியாத கோட்டை வெகுசிலவே, அதில் தமிழகமும் ஒன்று. அதை மேலும் பலமிக்கதாக மாற்ற திமுக’வும் அதிமுக’வும் நெருங்கி வரவேண்டிய கட்டாயம் அல்லது வாய்ப்பு கனிந்து வருகிறது. தமிழக அரசியல் அத்தியாயத்தில் அது ஒரு வரவேற்க தக்க மாற்றமாக இருக்கும். தமிழர்களின் நலனை மனதில் வைத்தாவது இதை யோசிக்குமா தமிழை விற்று பிழைத்த கட்சிகள்?

பிரபா’வை இந்தியாவிடம் ஒப்படைத்த பின்பு தனித்தமிழ் ஈழம் அமைப்பாரா ஜெயலலிதா?? - சீமானுக்கு ஒரு கேள்வி

2009-05-10T15:50:00.006+05:30

பிரபாக்கள் வரலாம் போகலாம் ஆனால் ஈழத்துக்கான தாகம் தீராது என இலங்கையிலிருந்து கூவும் குரல்களின் சுயநலம்தான், கருணாவின் பிரபா’வை மரியாதையாக நடத்துங்கள் எனும் மானங்கெட்ட வேண்டுகோள். பிரபா இல்லையென்றால் ஈழம் மரித்து விடும். அவனோடு மண்ணாகும் அந்தக்கனவு. எட்டப்பன்களை இனம் காண்பதில் பிரபா’வுக்கு இன்னமும் பயிற்சி தேவைதான். எதிரிகளை மட்டுமே ஒழிக்கப்பழகிய அந்த வீரன், புல்லுருவிகளை கண்டுகொள்ளாமல் விட்டுவிட்டான், நம் இனம்தானே என்ற நம்பிக்கை. பிரபா, வரலாறு முழுக்க தேடினாலும் தமிழனை போல துரோகம் செய்யும் ஒரு இனத்தை உன்னால் கண்டடைய முடியாது, தோற்றுபோவாய்.

களத்தில் எட்டப்பன்கள் என்றால் தாய்தமிழகத்தில் வல்லூறுகள். இனத்தை அழிக்க துணைபோன கட்சி ஒன்று. இனத்தின் எதிரியென அக்மார்க் முத்திரை குத்திக்கொண்டு வலம் வந்த அகோரம் இன்று தனிஈழம் அமைப்பேன் எனக்கு வாக்களியுங்கள் என பிணத்தை காட்டி வாக்கு கேட்கிறது. இத்தனை நாட்கள் ஈழத்தின் அவலம் கண்களுக்கு தென்படவில்லையா? பிரபாகரன் இப்பொழுது உங்கள் உயிருக்கு ஆபத்து இல்லையா? தமிழகம் விடுதலைப்புலிகளின் கூடாரம் என வடக்கத்தியர்களை தேனீர் ‘விருந்துக்கு’ அழைத்து சுப்புணி மாமாவுடன் ஒப்பாரி வைத்ததெல்லாம் தேர்தலுக்கு ஒரு வாரத்திற்கு முன்பு மாறிவிட்டதா??

நாம் முன்வைக்கும் கேள்வி:

1) தனித்தமிழ் ஈழத்தை அமைப்பேன் என சொல்லும் உங்களின் திட்டவரைவு என்ன?

2) அதில் விடுதலைப்புலிகள் குறித்த நிலைப்பாடு என்ன?

3) பிரபாகரனை பிடிக்க சட்டசபையில் நிறைவேற்றிய தீர்மானம் என்ன ஆயிற்று?

4)புலிகள் இல்லாத ஒரு ஈழம் (உங்கள் கனவிலாவது தமிழீழம் நிறைவேறினால்) எப்படி சாத்தியமாகும்?

இந்த கேள்விகளை வசதியாய் மறந்துவிட்டு, தனித்தமிழ் ஈழம் அமைப்பேன் என மக்களின் அவலத்தை கேவலப்படுத்தும் விதமாக ஏமாற்றி வாக்கு கேட்பது ஏன்?

சீமான் போன்ற உணர்வாளர்களும் அதற்கு துணை போனது ஏன்? என்றாவது இந்த தமிழர் பாதுகாப்பு பேரவை ஜெயலைதாவிடம் இந்த கேள்விகளை கேட்டிருக்கிறதா அல்லது மேடையிலாவது முழங்கி இருக்கிறதா?

கொடுத்த வாக்குறுதியை மீறீனால் ஜெயலைதாவை எதிர்ப்போம் என கூறிக்கொள்ளும் அரைகுறைகளே... அதற்கு பின் எதிர்த்து என்ன பயன்? இராஜபாக்சே’வுடன் கூட்டு சேர்ந்து போரில் மக்கள் இறப்பது விதியென்று ஏளனம் செய்யவதை கைகொட்டி ரசிப்பீர்களா? பிரபாகரன் இல்லை என்றால் தமிழினம் சிங்களவனின் அடிமை என்பதை அறியாமல் யார் ஆதரவு தந்தாலும் வரவேற்போம் என முட்டாள் தனமாய் அறிக்கை விட்டு, மேடைக்கு மேடை வாய்கிழிய பேசி என்ன பயன் சீமான்?

தமிழீழத்திற்கு ஆதரவு தரும் எந்த ஒரு கட்சியும் தங்களின் புலி நிலைப்பாட்டை விவரிக்காமல், தமிழனின் உணர்வுகளேடு விளையாடி ஓட்டு கேட்பது, அது தெரிந்தே புலி டி-சர்ட்டு அணிந்து மேடையில் பேசி நீங்கள் துணைபோவது... மிகவும் கேவலமாக இருக்கிறது. ஈழத்தை ஆதரிக்கும் இவர்கள் என்றாவது இந்திய இராணுவ அத்துமீறலை எதிர்த்து ஒரு வார்த்தையாவது பேசி இருக்கிறார்களா?

காங்கிரசை சாடி இருக்கிறார்களா? சோனியாவை எதிர்த்தாரா செயலலிதா?? ஆட்சி அமைக்கும் நேரத்தில் காங்கிரசில் கூட்டு சேர்ந்து உங்கள் முகத்தில் அசிங்கத்தை அப்ப போகிறார் அந்த பெண்மணி. மருத்துவன் சொன்னான் என மாடாய் கத்தி ஒட்டுவாங்குகின்றீர்... தேர்தலுக்கு பிறகு அவர் நிறம் மாறுவது நிஜம், அப்போது எதிர்த்து என்ன பயன்?? தடா’விலோ பொடா’விலோ உன் வாழ்க்கை சீரழியப்போவது தான் நாங்கள் காணப்போகும் துயரம்.

இலங்கை செல்லும் ராணும், புலிகள் என கூறி எஞ்சி இருக்கும் தமிழர்களை பிணக்குவியலாக்கி வெற்றியுடன் வீடு திரும்பும். அப்போது புலி-டீசர்ட்டை நீங்கள் கர்வமுடன் அணிந்து உறுமமுடியாது, அது உயிர்கொண்டு உங்கள் முகத்தில் காறிஉமிழும், மொத்த தமிழினமும் தான்.

ஜெயலலிதாவால் தனிஈழத்தை அமைக்க முடியுமா?

2009-05-07T15:21:00.004+05:30

வெற்றிபெற்றால் அன்றிரவே ஈழம் அமைத்து தருவேன் என பச்சோந்தி அரசியல் நடத்தும் ஜெயலலிதாவின் நேரக்கொடுமைக்கு துணைபோகும் ராமதாசை மன்னித்துக்கொள்ளலாம். நாயை குளிப்பாட்டி....... இத்தனை நாள் காவல் காத்த வைகோவ பற்றி ஒன்றும் சொல்வதற்கில்லை. கொள்கை குஞ்சுகள் என கொக்கரிக்கும் பெரியார் திக’விற்கு என்ன ஆயிற்று? எரியுற வீட்டுல புடுங்குன வரை லாபம் என பிரியாணிக்கும் குவார்டருக்கும் கொள்கையை விற்றுவிடுமளவிற்கு அவர்களின் நிலை வந்தது மிகவும் பரிதாபம்.

ஜெயலலிதாவின் சரித்திரம் அறியாதவர்களா அவர்கள்? ரெண்டு மாசத்துக்கு முன்னாடி தானய்யா போர்ல பொதுமக்கள் சாகறது சாதாரணம்னு கொழுப்பெடுத்து அறிக்கை தந்த அரைவேக்காட்டின் பின்னாடி எலும்புக்கு அலையுற தீவிர பெரியாரிஸ மட்டைகள் தமிழனின் சுயமரியாதையை கேவலப்படுத்துகின்றனர்.

ஈழமும் இலங்கையும் இந்தியாவின் கைநழுவி போய் பலகாலம் ஆகிவிட்டது. இலங்கையின் ராசதந்திர காய்நகர்த்தலில் இந்தியா ஒரு பகடை. ஆனால் மொத்த விளையாட்டும் சீனா மற்றும் இரசியாவின் ஆதரவில் முன்னெடுக்கப்படுகையில், அமெரிக்காவுக்கும் இந்தியாவுக்கும் ஒரு தடுப்பரணாக சீன-ரசிய முண்ணனி எங்கெல்லாம் இடம் கிடைக்கிறதோ அங்கெல்லாம் ஆட்டையை போட தயாராக இருக்கிறது. இந்தியா ஆயுதம் குடுத்தாலும் குடுக்காவிட்டாலும் போர் தொடர்ந்து கொண்டுதான் இருக்கும்.

இதில் நமக்கு மூன்று வகையான வாய்ப்புகள் உள்ளது அதை கவனிப்போம்:

காங்கிரஸ்-திமுக: திமுக அடிப்படையிலேயே ஈழஆதரவு கட்சி ஆனால் காங்கிரசின் நெருக்குதலில் தன் கொள்கையை விட்டு அசிங்கப்பட்டு நிற்கிறது. காங்கிரஸ் ஒரு முட்டாள் பெண்மணியின் கையில் அகப்பட்டுக்கொண்டு ராசபாக்ஸேயின் தந்திரத்தால் ஏமாற்றப்பட்டு கனவில் மிதக்கிறது. தன் கணவன் ஒரு வடிகட்டின முட்டாள், அவன் தொலைந்ததே இந்தியாவிற்கான விடிவுகாலம் என அறிந்துகொள்ளும் அளவிற்கு அறிவோ தெளிவோ அற்ற அந்த பெண்மணியின் பின் காங்கிரஸ் - அல்லது அவரது வாரிசுகளின் பின் செல்லும்வரை அந்த கட்சியுடன் கூட்டணி வைத்து ஈழபிரச்சனையை முன்னெடுப்பது அடிப்படையிலேயே இயலாத காரியம்.

காங்கிரஸை விட்டு வெளியே வராதது ஒன்று தான் திமுக செய்த பெரிய தவறு. எனினும் அவர்களின் நல்லாட்சி தந்த நம்பிக்கையில் வென்றுவிடும் கணக்கு போட்டிருக்கலாம். அல்லது காங்கிரசுக்கும் பெரும்பாண்மை கிடைக்காத பட்சத்தில் திமுகவின் அதிகபட்ச உறுப்பினர் எண்ணிக்கையை காட்டி ஈழ பிரச்சனைக்கு அழுத்தம் கொடுத்திருக்கலாம், இதுவே அவர்களின் திட்டம் என நினைக்கிறேன்.

இராமதாசின் பச்சோந்திதனம் யாவரும் அறிந்ததே. கொள்கை அடிப்படையில் அதை ஆராய முடியாது. தேர்தலுக்கு பின்னான கூட்டணிகளே மத்திய அரசை தீர்மாணிக்கும் அடிப்படையில் திமுக இன்னமும் ஒரு வாய்புக்காக காத்திருக்கிறது. ஈழத்தை அமைக்க இன்னமும் நாம் எதிர்பார்க்கும் கட்சியாக திமுக இருப்பதே அதன் பலம்.

அதிமுக-கம்யூனிஸ்ட் வகையாறா: சீனாவின் தத்துப்பிள்ளை கம்யூனிஸ்ட். எந்த ஒரு சூழ்நிலையிலும் இவர்களால் தனி ஈழம் அமையும் என எதிர்பார்ப்பது வெறும் கனவே. இலங்கை, சீனா-இந்தியாவின் பலத்தை சோதிப்பதற்கான களம் எனும் அடிப்படையில் தேசத்துரோக கம்யூனிஸ்ட் எந்த ஒரு சூழலிலும் சீனாவிற்கு எதிராக செல்லாது. இதில் ஜெவின் அலம்பல் எவ்வளவு தூரம் செல்லும் என தெரியவில்லை. இப்போதே காங்கிரஸ் ஜெவுக்கு வலை வீச ஆரம்பித்துவிட்டதால் தேர்தலுக்கு பின் திமுக-கம்யூனிஸ்டுகளுடன் சென்றாலும் பெரிதான பலன் இல்லை- ஈழவிசயத்தை பொறூத்தவரை இதுதான் நிஜம்.

கம்யூனிஸ்டுகள் ஆட்சிக்கு வந்தால் ராணுவ உதவி மேலும் அதிகரிக்கும்- வெகுவிரைவில் இலங்கையில் நேபாளத்தை போல - கம்யூனிஸ்டின் ஏதோ ஒரு அங்கம் ஆட்சியை பிடிக்கும். ராஜபாக்சே ஒரு இடைக்கூத்துதான்.

பாஜக: ஆயிரத்தெட்டு கடுப்புகள் நமக்கு இந்த கட்சியின் மீதிருந்தாலும் - இந்தியாவை சீனாவின் நெருக்கதல்களுக்கு எதிராக செயல்படும் ஒரு கண்டிப்பான தலைமையை தர இவர்களால் தான் முடியும். ஒன்றூமற்ற நேரத்திலேயே பஜக’வுடன் கூட்டணிவைத்த திமுக - ஈழ விசயத்தின் அடிப்படையில் பஜகவிற்கு ஆதரவு அளிப்பது சாலச்சிறந்தது என தோன்றுகிறது. ராமர்பாலத்தை விட- மதம்- ராமன் - மொக்கைகளை விட, இந்தியாவின் பாதுகாப்பும் - ஈழமும் இப்பொழுது நம் முன்பிருக்கும் மிகப்பெரிய சவால்கள்.

சீனா ஆயுதத்தை தரக்கூடாது என்ற எண்ணத்தில் தான் இந்தியா தருவது ஒரு புறம் - ராஜீவ் கொலைக்கான பழிவாங்கல் இன்னொருபுறம் என்றாலும்- இரண்டாவது காரணம் தான் இப்போதைய போரை முன்னெடுக்கிறது. எனவே மிகவும் கண்டிப்பான திட்டங்கள் மற்றும் வாக்குறுதிகளின் அடிப்படையில் பஜக’விற்கு ஆதரவளிப்பதே சிறந்த முடிவாக இருக்கும்.

மதமா - மனித உயிரா எனப் பார்த்தால் மனித உயிர் தான் முக்கியம். இலட்சகணக்கான தமிழர்களின் உயிர்தான் முக்கியம். என் நோக்கில் ஈழத்தில் எந்த ஒரு முன்னேற்றமும் ஏற்பட வேண்டுமென்றால் - பஜக பெரும்பான்மை பிடித்து அதற்கு திமுக வெளியில் இருந்து ஆதரவு தரும் நிலை ஏற்பட வேண்டும். மதிமுக - பமக திமுகவுடன் வரவேண்டும். அதிமுக காங்கிரசுடன் செல்லம்பட்சத்தில் இது ஒன்றுதான் தீர்வு.

பஜக தமிழகத்தில் ஒரு ஜோக்கர் என்பதால் அது தமிழக - ஈழ பிரச்சனையை பெரிதாக அலட்டிக்கொள்வதில்லை. ஆனால் காங்கிரஸ்- கம்யூனிஸ்ட் மற்றும் தேசப்பாதுக்கப்பு- சீனாவின் ஆதிக்கத்தை மட்டுறுத்தல் மற்றும் ஈழ பிரச்சனைக்கான குறைந்தபட்ச தீர்வான ராணுவ உதவியை நிறுத்துவது என எதையும் தைரியமாக செய்யும் கட்சியாக நாம் இப்போது நம்ப தகுந்த கட்சி அது ஒன்றே.

இதை கருணாவும் அவரது சகாக்களும் கண்டுகொள்ள தவறிவிட்டனர். இப்பொழுது பஜக’வும் பெரும்பான்மைக்கு வெகு அருகில் இருப்பதாக கணிப்புகள் சொல்கின்றன. அறுதிப்பெரும்பாண்மை கிடைக்காது தான், அந்த சூழலில் தான் திமுக’வின் ஆதரவு மிகவும் பயனுள்ளதாக - ஈழ தீர்வுக்கு ஒரு அடிப்படையாக அமைந்திருக்கும். அத்வானி-ஜஸ்வந்த் சிங் முதலானோர் ஈழத்திற்கு ஆதரவாக பேசினர் சமீபத்தில் - மேலும் ஒரிசாவும் பஜக’வுடன் இல்லை. இந்த சூழலில் பஜக - பிரசனையின் அடிப்படையில் ஒரு நல்ல வாய்ப்பு- திமுக தவறவிட்டுவிட்டதா அல்லது தேர்தலுக்கு பின் ஒட்டிக்கொள்ளுமா என்பதை பொறுத்தே நாம் எதையும் சொல்ல முடியும்.

----------------------------

ஜெயலலிதா பெரும்பாண்மை பெற்று காங்கிரசுடன் சேரும் சூழலில்- ஈழம் ஒரு கனவு மற்றும் பல நாடகங்களுக்கான முத்தாய்ப்பு - ஸ்டார்ட் த மீஜிக். ஜெயலலிதா பஜக’வுடன் சென்றால் அவர் ஈழத்திற்கான தீர்வை முன்னெடுப்பது சுலபம். அப்படி ஒன்று நடந்தால் - ஈழச்சொந்தங்களுக்காக அவரின் அத்தனை கொடுமைகளையும் தாய் தமிழகத்தில் நாம் சகித்துக்கொள்ளலாம். ஆனால் அவர் நம்பத்தகுந்தவர் அல்ல. பஜகவே தன் கொள்கையை மாற்றிக்கொண்டாலும் இவர் மாறாதவர். ஏதாவது ஒரு மலையாள நம்பூதிரி வந்து ஈழத்தில் உங்களுக்கு கண்டம் என்றால் வாயை மூடிக்கொள்வார். தமிழர்களுக்கெதிராக பிளான்பண்ணி குறிசொல்வதில் மல்லுக்கள் சாமார்த்திய சாலிகள். கண்ணகி சிலை இடிக்கப்பட்ட்தே சாட்சி.

உள்ளூர் கூத்துக்கள் இப்படி இருக்க, உலகின் கவனத்தை ஈழத்தின் பக்கம் திருப்பிய புலம்பெயர் தமிழர்களுக்கு தான் நாம் மிகவும் நன்றிக்கடன் பட்டிருக்கிறேம். சோனியாவும்-கருணாவும்-ஜெ-வும் சாதிக்க முடியாததை புலம்பெயர் உறவுகள் முன்னெடுத்து உலகளாவிய ஆதரவை திரட்டுகிறது. இப்போதைக்கு நமக்கிருக்கும் நம்பிக்கை அது ஒன்றே. ஈழத்திற்கன ஆதரவும், அனுதாபமும் தான் தமிழகத்தில் இருக்கிறது – தீர்வு இருப்பது அமெரிக்காவின் தலைமையிலான உலகநாடுகளின் கைகளில். சீனாவின் ஆதரவில் மட்டுமே எத்துணை நாள் இலங்கை தனித்துநிற்கிறது என பார்ப்போம்.

இலங்கைக்கான நெருக்குதலகளை சர்வதேச சமூகத்தின் மூலம் முன்னெடுத்து, அல்லலுறும் ஈழத்திற்கு ஆதரவாக இருப்பது தான் முக்கியம். இந்த தேர்தல் கூத்துகள் ஒரு வாரத்திற்கு தான். நமக்கான தீர்வு நம் கையில் தான் இருக்கிறது. யாரையும் நம்பி பயனில்லை என்பதை உலகத்தமிழர்கள் உணர்ந்து இந்த தமிழக தேர்தலுக்கு அதிகம் முக்கியத்துவம் தராமல் மேலும் மேலும் உலக மக்களை, அரசாங்கங்களை சென்றடையும் வழிமுறைகளை கண்டடைய வேண்டும்.

காக்கும் தலைவன் அண்ணன் பிரபாவைத்தவிர யாரும் இல்லை. அவனை இடைக்காலத்தில் நாம் கைவிட்டதன் பலன் தான் இன்று நம்மைச்சூழ்துள்ள அவலங்கள்.பிரபா சர்வாதிகாரி என குற்றஞ்சுமத்தியவர்களுக்கு தெளிவான பதிலை ராஜபாக்சே தந்துகொண்டிருக்கிறான். நம்பிக்கையை தளரவிடாமல் போராடுவது ஒன்றுதான் ஒரே வழி. நமக்கான மீட்பன் அவன் ஒருவனே.

ஜெயிப்பாய்ங்க... ஆனா ஜெயிக்கமாட்டாய்ங்க

2009-05-07T12:55:00.004+05:30

உடன்பிறப்புகளின் கனவில் திரியகிள்ளி பட்டாசு வெடிச்சு பயமுறுத்துகிறது TOI கணிப்பு. 7 இடம் தான் கிடைக்கும் திமுக கூட்டணிக்கு, அதிமுக அள்ளப்போகிறது மத்த சீட்டுகளன்னு பீதிய

கெளப்பிவிட்டுட்டாங்க.

கருத்துக்கணிப்புகளின் இலட்சணம் நாமறிந்தது தான் என்றாலும், திமுக’வின் செயல்பாடுகள் நமக்கு கடுப்ப கழட்டதான் செய்யுது. முன்னெப்போதும் கண்டிராத கலைஞராக, அய்யோ பாவமாக காட்சியளிக்கிறார். அவரை தன்னளவில் இயங்க விடாமல் இம்சை தரும் ஸ்டாலின், அழகிரி தான் முழுமுதல் குற்றவாளிகள் என நினைக்கிறேன்.

இரண்டாம் நிலை தலைவர்கள் எனும் அடிப்படையில் எந்த ஒரு பிரச்சனையையும் தீவிரமாக எதிர்க்கும் ஆற்றலோ திட்டமிடலோ ஸ்டாலினிடம் இருபதாக தெரியவில்லை. அப்பா மண்டயா போட்டா கழகத்த காயவிட்டுடுவாங்க போல இருக்கு ரெண்டுபேரும். தெளிவான தலைமை என்பது தன் இனத்திற்காக எப்போதும் குரல் கொடுத்துக்கொண்டே இருக்க வேண்டும்.

ஒரு அரசியல் stunt எனும் அளவிலாவது ஸ்டாலின் போராட்டங்களை முன்னெடுத்திருந்தால், வளர்ச்சியின் அடையாளமாக அடுத்த முக’வின் அரைகுறையையாவது தொட ஒரு வாய்ப்பாக இருந்திருக்கும். தள்ளாத வயதில் இருக்கும் தந்தைக்கு பாரமாக தான் இருக்கின்றார்கள் இருவரும். அமைதி என்பது பக்குவமல்ல, அடிமேல் அதி வைத்து முன்னேறுவதே பக்குவம்.

-----------------------------

திமுக’விற்கு ஓட்டு போடாதீங்கன்னா ஒரு மாதிரி பாக்குறாங்க வீட்ல. நல்லாதானடா இருந்த என்ன ஆச்சு?? இல்ல அவங்க ஈழ பிரச்சனைல ஒன்னும் பண்ணல அதனால அவங்களுக்கு ஓட்டு போட வேணாம். அதுக்காக ஜெயலலிதாவுக்கு ஓட்டுபோட சொல்றியா?? ................. :(. அது எங்க பரம்பரைக்கே புடிக்காத சின்னம். ஈழ பிரச்சனையின் இருட்டடிப்பு அவர்கலுடன் பேசும்போது தான் புரிகிறது. அத்தனை அலைவரிசைகள் இருந்தும் ஈழபிரச்சனை மக்களின் ஆழத்திற்கு செல்லாத நிலை ஒரு சாபக்கேடு தான்.

ராஜ தந்திரி என அறியப்பட்ட கலைஞர் எப்படி கணக்கில் தவறினார் எனத்தெரியவில்லை. வட தமிழ்நாட்டில் திமுக சீட்டுகளை அள்ளும். ஆனால் தென் தமிழகம் கஷ்ட்டம் போலத்தான் தெரிகிறது.

-------------------------

ஈழப்பிரச்சனை எந்த அளவுக்கு தேர்தலில் பிரதிபலிக்கப்போகிறது எனத்தெரியவில்லை. அடித்தட்டு மக்கள் இன்னமும் ஒரு ரூபாய் அரிசிக்கும், இலவச தொலைகாட்சி பெட்டிக்கும், தரப்படும் பணத்திற்கும், அரசாங்க ஊழியர்கள் as usual கழகத்திற்கும் சார்பாக இருப்பதால்... தமிழ்மண கருத்துக்கணிப்புகள், வயிற்றெறிச்சலகள், கோவங்கள், ஈழ அவலத்தின் வலி-இயலாமை இவை எல்லாவற்றையும் தாண்டி திமுக பெரும்பான்மை பெரும் எனத்தான் தோன்றுகிறது.

------------------

Intellectual Analysis எப்போதும் தேர்தலில் எடுபடுவதில்லை. அது ஓட்டளிக்கும் அடித்தட்டு மக்களின் கைகளில் இருப்பதால். இவ்வளவு மொக்க போட்டாலும், நான் போய் ஓட்டுப்போடப்போவதில்லை. என்னைப்போல் தான் பெரும்பாலோனோரும். பொட்டக்கோழி கூவி பொழுது விடியுமா?? நாமெல்லாம் பொட்டக்கோழிகள் தான். உண்மையான சேவல் ஓட்டுப்போடும் அடித்தட்டு மக்கள் மற்றும் கருத்து கண்ணாயிர அரசாங்க ஊழியர்கள். செல்லாத ஓட்டுக்களை திமுக’விற்கு திருப்பி விடுவதில் இவர்களை மிஞ்ச முடியாது. :).

---------------------

எனக்கு திமுக’விற்கு ஓட்டளிக்க விருப்பமில்லை. ஆனாலும் அவர்கள் ஜெயிப்பார்கள் என்றே தோன்றுகிறது. ஈழ அவலத்தை தவறாக கையாண்டதிற்காகவாவது அவர்கள் தோற்க வேண்டும் ஆனால் அது நடக்குமா எனத்தெரியவில்லை.... நம்ம தமிழ்மண கருத்துக்கணிப்புகள் எல்லாம்.. “நீங்க எம்.ஜி.ஆர் மாதிரி தகதகன்னு மின்னுறீங்கன்னு வடிவேலுவ பார்த்து சொன்ன கத தான். தீர்ப்பு மக்களின் கையில்.

-------------

இளிச்சவாயன் இந்தியன் :)

2009-04-26T11:33:00.004+05:30

இன்று Times of India வை புரட்டியவர்களுகு கற்கண்டு செய்தி: India upset with China over Sri Lanka crisis.

கேக்கவே, படிக்கவே எவ்வளவு சந்தோசமா இருக்கு! வேற என்னத்த புடுங்க முடியும் இவனுங்களால? Upset Downset எல்லாம் வேலைக்கு ஆகாது மாமு.. சீனாக்காரன் பெருசா ஆப்பு வைக்கறப்ப தாண்டா புரியும் உங்களுக்கு. ஒரு இனத்தை அழிக்க மாமா வேல பாத்தீங்களே.. இப்ப என்ன பண்ண உத்தேசம்.

அய்யா நா கணேசன் அவர்கள் ஒரு Scribd Dcoumentஐ சில நாட்களுக்கு முன் சுட்டி இருந்தார் http://nganesan.blogspot.com/2009/04/eelam.html. மிகப்பெரிய ஆவணம். நேரமெடுத்து படியுங்கள். இந்தியன் எவ்வளவு கோமாளித்தனமா இருக்கான்னு இப்ப தான் புரியுது. மொத்த இந்தயப் பெருங்கடலும் சீனாவின் ஆதிக்கத்துல இருக்காம். கொடும என்னான்னா இந்தியாலயே பல துறைமுக பராமரிப்பு சீன கம்பெனி தான் பாத்துக்குது. கேக்கவே சந்தோசமா இல்ல?? :)

தமிழன அழிச்சிக்கோ பரவால்ல. எங்கயாவது போய் தட்டு கழுவியாவது பொழச்சுப்பான். ஆனா சீனாக்காரன் உன்னோட நாட்டுலயே உனக்கு ஆப்பு வச்சிகிட்டு இருக்கான். ஒரு பக்கம் நேப்பாள், பாகிஸ்தான், பங்களாதேஷ், மியன்மார், இப்போ இலங்கை. போதுமா இன்னமும் வேனுமா?

மங்கோலிய செங்கிஸ்கானின் பரம்பரை ஆரிய அரைகுறைகளின் குடிமியை பிடித்து ஆட்டுகிறார்கள் அனைத்து பக்கமும். இலங்கையே எங்க கைல தான்னு வெத்து உதார் விட்டு திரியும் இந்தியாவிற்கு அடிக்கடி இலங்கை ஆப்பு வெச்சாலும் அத வெளிய காட்டாம ஷோ காட்டும் இந்தியா “ரொம்ப... நல்ல நாடு” அவ்வ்வ்வ்வ்வ்வ்வ்வ்வ்வ்.

தமிழீழத்த இந்தியாவின் நீட்சியாகவே கருதி இருக்க முடியும். லங்காவில் சீனா கட்டும் மிகப்பெரிய துறைமுகங்களுக்கு ஒரு செக் வச்ச மாதிரியாவது இருந்திருக்கும், ஆனா இவிங்க பாவம் வடிவேலுவவிட அப்பாவியால்ல இருக்காங்க. இதுல சேது சமுத்திரம் ராமன் கொத்தனார் வேல பாத்த எடம் சித்தாளோட படுத்து எழுந்த எடம்ன்னுட்டு காமெடி பண்ண.. சீனாக்காரன் அங்கயும் துறைமுகம் போட்டுட்டானாம்.

சீனாக்காரன் சொல்றான்.. உங்களையெல்லாம் பாத்தா எனக்கு பாவமா இருக்கு...:) அமெரிக்கா இப்ப தான் எந்திரிச்சு இருக்கு... இருந்தாலும் டூலேட். சீனா ஹாட்ஸ் ஆப்.

ஒரு கத சொல்வாங்க.. குட்டி மீன புடிச்சிட்டு குதிச்சவன பாத்து திமிங்கலம் அமைதியா இருந்துச்சாம்.. அவன் குதிச்சுகிட்டிருந்ததே திமிங்கலத்தின் மேல தான். ஹாஹா இந்தியா இப்போ சீனாங்கற திமிங்கலத்தின் மேல. வட இந்தியனுக்கு புத்தி கம்மின்னு சொன்ன நீங்க தான் கேக்காமாட்டீங்கறீங்க. :)

தஞ்சை பெரிய கோயில் - 1780ஆம் ஆண்டு ஓவியம்.

2009-04-22T01:54:00.004+05:30

இது கோவிலின் நுழைவாயில், பின்புறம் சிறிதாக தெரிவது கருவறை என நினைக்கிறேன். இதை வரைந்த வில்லியம் ஹாட்ஜஸ் இந்தியா முழுவதையும் தன் தூரிகையினால பதிவு செய்திருக்கிறார். . வாரன் ஹாஸ்டிங்ஸ் காலகட்டத்தில் வரையப்பட்ட இது, அவரின் சேமிப்பில் இருந்து கண்டெடுக்கப்பட்டிருக்கிறது.

கோயிலின் வலப்புறம் இருக்கும் முதல் விதானத்து ஆங்கிலேய சிற்பங்கள் இரண்டும் இந்த காலகட்டத்தில் திணிக்கப்பட்டிருக்கலாம். தமிழகத்தில் பார்க்கவேண்டிய இடங்கள் என யாராவது கேட்டால் நான் முதலில் குறிப்பிடுவது தஞ்சை பெரிய கோயில்தான். :)

வில்லு படப்பாடலின் 'அசல்’

2009-04-18T12:33:00.003+05:30

வில்லு படத்தில் வரும் சிறிய பாடலான Are you crazy, கீழே உள்ள பாடலின் அப்பட்டமான காப்பி அல்லது திருட்டு.

The Mama's and Papas - California Dreamin. மிகவும் பிரபலமான பாடல். முடிந்தால் Lyrics படித்து பாருங்கள். அருமையான வரிகள்.

The Rolling Stones' -The 500 greatest songs of all time'ல் 89 இடத்தில் இருக்கும் பாடல். அந்த 500 பாடல்களுமே மிக அருமை. இசையில் - வெஸ்டர்ன் - ஆர்வமுள்ளவர்கள் தரவிறக்கி கேட்கலாம். உங்களை மறந்து வேறு உலகத்தில் சஞ்சரிக்கலாம்.

வெஸ்டர்ன் என்றால் டிரம்ஸ் இரைச்சல் என்னும் sterotype எண்ணத்தை தவிடு பொடியாக்கும் பாடல்கள்.

தேவிசிரிபிரசாத் சுட்ட அந்த பாடல்

எல்லைகளின் கனவுகள்

2009-04-15T11:27:00.005+05:30

கனவுகளுக்கு எல்லையில்லை

காலம் காலமாய் நிகழும்

துரோகத்துக்கெதிராக கொடிபிடிக்க

கூட்டத்தில் நரம்பு புடக்க கத்த

அட்டைகளுடன் போராட ரகசிய

திட்டங்களுடன் எல்லைகள்

குறித்த பயத்துடன் கனவுகள்.

கனவுகளின் எல்லைகளற்ற வெளி

ஒருபுனைவென்பது நீங்களறிந்திருக்க

வாய்ப்பில்லை என தினமும் உறக்கமற்று

புரண்டுஅழும் கனவுகள் குறித்த கவலை

சிறுதுமில்லை உங்களுக்கு, எல்லை

மறந்த வெளியின் நீள அகலங்களை

உங்களுக்காய் கட்டி காக்கும் கனவுகள்

தொடர்ந்த அச்சுறுத்தலில் வாழ்ந்து

வருவதும் நீங்கள் அறியாததே.

மாயவெளியை காவல் செய்யும்

நிதர்சன காவலர்களின் தோட்டாக்களும்

ஆவணங்களும் தண்டனை குறித்த

எச்சரிக்கைகளும், உதிரம் தோய்ந்த

சச்சரவுகளும் கனவுகள் அனுதினம்

எதிர்கொள்ளும் அடக்குமுறைச் சட்டங்கள்

என்றுணர்ந்து கனவுகளின் கழுத்தை

நெரிக்காமல் இருக்க எப்போது

பழகப்போகின்றீர்கள்?

எல்லைகளுக்குட்பட்டு கனவு காண

அனுமதிக்கப்பட்ட அடிமைகள் நாம்

என்பது நொடிக்கொறுமுறை நிதர்சனத்தின்

கனவுகளில் அனுபவித்து ரசிக்கப்படுவதால்

எல்லைகளின் தயவில் உயிர்பெற்றுலவுகின்றன

உங்கள் அடிமைத்தனத்தை உறுதிப்படுத்தும்

கனவுகள்.

உலகம் மாறுதே... உயிர் சுகம் தேடுதே...

2009-04-14T22:44:00.004+05:30

நிராகரிப்பின் பட்டியலை தயார் செய்து செயல்படுத்தவும் ஆரம்பித்தாகிவிட்டது. தயக்கத்துடன் ஆரம்பித்த பட்டியல் இப்போது வேகங்கொண்டு தினமும் ஒரு செயலாக அட்டவணையில் இடம்பிடிக்கிறது.

நிராகரிப்பின் முதல்கட்டமாக என்னையே நிராகரித்தேன். என் மறுபக்கம் என்றழைக்கபப்டும் எனது பதிவுகளை அழித்தேன். என்னை நிராகரித்தேன். பொருண்மையுடன் “நான்” என குவியும் எண்ணங்களை கொளுத்தினேன். அய்யா மருத்துவர் ருத்ரன் enui என்ற மனநேய் இது என்று என்னை பைத்தியமாக்கினார். எல்லோரும் பாத்துகங்க நானும் பைத்தியந்தான். :)

என்னை நிராகரித்த பின் என் பதிவு சார்ந்து நான் செய்த மற்றொரு நிராகரிப்பு, StatCounter Widegetஐ தூக்கிவிட்டேன். எண்ணிக்கைகளுக்கேற்ப நம் தூக்கத்தை கெடுத்துக்கொள்ளும் அதீத நிலைஇனி வராது. அதன் பின்பு தொலைகாட்சி பெட்டியை நிராகரித்தேன். ஆயிரங்களை கொட்டி வாங்கிய LCD பகல் முழுவதும் என்னை வெறுமையாக வெறிக்க நான் மடிக்கணிணியில் தரவிறக்கிய பழைய படங்களை பார்த்தேன். சன், பன், மூன், கன் என எந்த அலைவரிசையும் என்னை கொலைவெறிக்கு தூண்டுவதில்லை இப்போதெல்லாம்.

தொலைகாட்சி பெட்டியை நிராகரித்து பின்பு இணையத்தில் மேய்ந்தாலும், கிரிக்கெட் தேசியவாத அடையாளங்களை மறுதலித்தேன். இலங்கைக்கு இந்தியா விளையாட சென்ற தினத்திலிருந்து கிரிக்கெட்டை கண்டுகொள்வதில்லை. நம்மை ஆக்கிரமிக்கும் அடையாளங்களை நிராகரிப்பது நம் சுதந்திரத்தை காத்துக்கொள்ள அடிப்படை தேவையாகும். இந்த பட்டியலில் அண்மையில் இடம்பிடித்தது தி.மு.க’விற்கு ஓட்டளிக்க கூடாது என்பது மற்றும் இந்த தேர்தலை புறக்கணிப்பது.

சமீபத்தில் இரண்டு வாரங்கள் ரசித்த திரைப்பாடல்கள் “சர்வம்”, குபூகொபூ. இரண்டிலும் பாடல்கள் பரவாயில்லை. மிகவும் ரசித்தது சர்வம் படத்தின் “காட்டுக்குள்ளே மழையை போல் பாடலும், குபூகொபூ’வில் வரும் ஒரு நிமிஷம் எனும் ஒப்பாரி பாடலுதான். ஒப்பாரி அதீத சுவை கொண்ட பாடலாய் இருக்கிறது. கொட்டும் மழையின் பிண்ணனியில் "உலகம் மாறுதே உயிர்சுகம் தேடுதே” எனும் வாரிகள் மிகவும் இனிமை. சர்வம் படத்தை பாடல்களுக்காய் பார்க்க வேண்டும்.

வாழ்க்கையை நிராகரிக்க முடியா அடிமை, வாழ்வின் சில கூறுகளை நிராகரித்து என் இருப்பை அதன் சுதந்திரத்தை நிறுவமுயல்கிறேன். உலகம் மாறுதே உயிர் சுகம் தேடுதே.

கஜா ஓட்டல்- இழந்த சொர்கம்.

2009-04-13T23:00:00.005+05:30

கிருட்டிணகிரி ஆனந்த் தியேட்டருக்கு செல்லும் சந்தில் மணி ஓட்டலுக்கு போட்டியாக நாங்கள் ரவுசு கட்டிய இடம்தான் கஜா ஓட்டல். என் நண்பன் கஜா. ஒரு சினிமா ஹீரோவுக்கான அனைத்து தகுதிகளுடன் (6வது வரை படித்திருப்பதும் கூட :)), கஜா என கிறுக்கலாக kஐயெழுத்து போடும் கஜா அன்பானவன். தினமும் ஒரு குவாட்டர் அடித்து, டைட் ஜீன்ஸ் போட்டு, அம்மா இறந்த பின் பள்ளிக்கு சொல்வதை விட்டு, தன் ஒரே தங்கையின் மீது உயிரை வைத்திருக்கும் மிக சாதாரணன். கோபப்படுவதும், மப்பு அதிகமானால் அழுவதும், அஜீத்குமார் போஸ்டர்களுடன் டயல்லாக்கையும் பேசி எங்களை கொல்வதும் அவனது வாடிக்கை.

அந்த சந்தில் இரண்டு லாட்ஜ் மற்றும் அதன் பெருமையை கட்டி காக்கும் சில பெண்கள் அல்லது முதுபெண்டிர் இருந்தனர். அவர்களை வகையாய் இனம் கானும் திறன் பெற்றவர்கள் எங்க கடை மாஸ்டர்கள். மாஸ்டர் என்பவர் பெரும்பாலும் ரொட்டி போடுபவர். இயல்பாகவே திரட்சியான தோற்றம் கொண்டவர். கடையின் ஓரம் வந்து நிற்கும் அந்த பெண்களை வம்புக்கு இழுப்பதில் பெரியசாமி கைதேர்ந்தவன். வயதில் பெரியவர் என்றாலும் மாஸ்டர்களை பெயர் சொல்லியும், வாடா போடா என்றும் தான் அழைப்போம். அவர்கள் மற்றவர்களின் முன்னிலையில் முதலாளி என்றும் மற்ற நேரங்களில் பெயர் சொல்லியும் அழைப்பார்கள்.

உடல்தொழில் சொய்பவர்களின் உலகம் எனக்கு மெதுவாக பிடிபட ஆரம்பித்தது அங்கே தான். நான் சொல்வது 95ல். எல்லா பெண்களுக்கும் எய்ட்ஸ் இருந்தது பிற்பாடு எங்களுக்கு தெரிய வந்தது. மிகவும் ஒல்லியாக இருக்கும் லச்சுமி, மதிய வெயிலில் வேர்க்க வேர்க்க குஸ்காவை அப்பி, ஒரு குவாட்டரை ராவா அடிக்கும். கடைக்குள் யாரும் தண்ணி அடிக்க கூடாது ஆனால் அவர்களுக்கு தனிச்சலுகை.

அண்ணா அண்ணா என்று வாய்நிறைய கூப்பிடுவார்கள் :(. இயல்பாகவே எங்களை விட மூத்தவர்கள். ஒருநாள் லச்சுமி அதிக மப்பில், மழை பொய்துகொண்டிருந்த ஒரு மதிய நேரத்தில், அழ ஆரம்பித்துவிட்டது. தன் வீட்டுக்காரன் தான் தினமும் இந்த தொழிலுக்கு அனுப்புவதாகவும், பணம் எடுத்துச் செல்லவில்லை என்றால் அடிப்பதகவும், தான் இந்த தொழில் செய்வது தன் மகனுக்கு ஓரளவு தெரிய் ஆரம்பித்துவிட்டது எனவும், நான் இன்னும் சில ஆண்டுகளில் இறந்துவிடுவேன் என்றும் தன் புடவையை இறக்கி காட்டியது, அடிவயிற்றின் ஓரங்களில் படைவந்ததுபோல் தெரிந்தது. எல்லோரும் ஏறக்குறைய அழும் நிலமைக்கு ஆளானோம்.

அப்புறம் அவளே சகஜமாகி, நான் இங்க வரலன்னா செத்துபோயிட்டன்னு நெனச்சுக்கங்க அப்படின்னு சாதாரணமா சொல்லி எங்கள மெரள வச்சிட்டா. கஜா அன்னக்கி மட்டும் தண்ணீ அடிச்சிட்டு ஓவரா அழுதான். நான் தண்ணி அடிக்காமயே அழுதுட்டேன். லச்சுமி அப்புறம் செத்துப்போச்சாம். நான் இஞ்சினியரிங் படிக்க சென்னை போய் லீவுல வந்தப்போ கஜா சொன்னான.

ஓட்டல் ஒரு நிலையில்லாத இடம். மாஸ்டர்கள் அடிக்கடி ஓடிவிடுவார்கள். புதிய மாஸ்டர் வருவார். ஒவ்வொருவர் ஒருவிதம். ஆம்டேட் போடுவது, மாவு பிசைவது, பீடா பிடிப்பது, சேர்வா வைப்பது என தனி ஸ்டைல் இருக்கும். ஒரு மாஸ்டர் (பெயர் நினவில் இல்லை.. ஏதோ ஒரு சாமி :(, நல்ல நண்பன், பெயர் வந்து தொலைய மாட்டேன் என்கிறது), மிகவும் ஒல்லியாக இருப்பான். இருவத்தி ஒன்பது வயது. அவன் பார்வை மிகவும் அலாதியானது. காக்காவுக்கு நடக்க தெரியாது, நாய் ஒரு பக்காமாக சாய்து ஓடும் என அரிய விசயங்களை எனக்கு சொல்லி கொடுத்தவன்.

ஓட்டல்களில் இன்னொரு ஈர்ப்பு, ஸ்டீரியோ செட். கார் செட்டில் ஸ்பீக்கர் கட்டி இல்லாத வித்தை காட்டுவோம். பள்ளி பெண்கள் எங்கள் ஓட்டல் முன்நின்று பஸ் ஏறுவதால், பாட்டு பலமாக ஒலிக்கும். இளையராஜாவின் அருமையான பல பாடல்களை எனக்கு அறிமுகப்படுத்தியது அந்த மாஸ்டர் தான். அதில் எப்போதும் பிரதானம் “பூபாளம் இசைக்கும் பூமகள் ஊர்வலம்’. முதன் முதலில் அவன் கேசட்டில் தான் அந்த பாடலை கேட்டேன். இப்பொழுதும் அந்த பாடலை கேட்கையில் அவன் நினைவுதான் வரும்.

என் காதலிக்காக காத்திருந்த தருணங்களில் நான் கேட்டு முதன்முதலாக அழுத “மேகங்கள் என்னைத்தொட்டு போனதுண்டு” பாடல் இன்னமும் எனக்கு கஜா ஓட்டலை தான் நிலைவுபடுத்தும். அந்த ஓட்டலுக்கென்று தனிப்பெயர் எதுவும் இல்லை. கஜேந்திரன் அவனது பெயர் எனவே கஜா ஓட்டல். எங்கள் செட்டில் பெரும்பாலும் ரவுடிகளும், போலீசால் தேடப்படுபவர்களும், பிக்பாக்கெட்டுகளும் இருந்ததால் எஞ்சினியரிங் சென்ற நான் ஒரு அன்னியன்.

கஜா என்னையும் என் காதலியையும் அவன் வீட்டிற்கு அழைத்து செல்வான், அவனது வீட்டில் இருப்பவர்களிடம் நாங்கள் திருமணம் செய்துகொள்ளப்போவதாக சினிமா டயலாக் பாணியில் சொல்வான். அவனுடைய அப்பா எனக்கு நல்ல நண்பர். தங்கச்சி தங்கச்சி என என் காதலியை உரிமையுடன் அழைக்கும் அவன் கடைசிவரை அதை கடைபிடிக்கவும் செய்தான். நான் சென்னை சென்றபின் என் காதலியை வேரொரு பையன் கைப்பற்ற(5 வருட காதல் :( ), அதை எனக்கு சொல்லாமலே மறைத்துவிட்டான் கஜா. கொஞ்ச நாள் கழித்து ‘விஜய்’ மணி மப்பில் உளறிவிட்டான்.

அப்போதும் கஜா அவளை விட்டு தரவில்லை. என் தங்கச்சி எங்கிட்ட வந்து சொல்லிட்டாடா.. அண்ணா நீங்கள்ளாம் ரவுடிங்க.. இசைக்கு தெரிஞ்சா எனக்கு எதுவும் பிரச்சன வராம நீதான் பார்த்துக்கனும்னு சொல்லிட்டா”. எனக்கு என்ன சொல்வதேன்றே தெரியவில்லை. இந்த வாரம் ஊருக்கு சென்றிருந்தபோது அந்த ஓட்டல் அங்கு இல்லை. இடித்து விட்டிருந்தார்கள். அந்த ஓட்டல் எனக்கு சினிமா பாரடிசோ போன்றது. என் இரண்டு வருடங்கள் பொற்காலமாய் கழிந்த இடம் அது. பரோட்டா, தோசை, சட்னி, சேர்வா, மாஸ்டர்கள், பாலியல் தொழில் பெண்கள், வெவ்வேறு மனிதர்கள் என வாழ்க்கையை கற்றுக்கொடுத்த பள்ளிக்கூடம் அது.

கஜாவிற்கு சமீபத்தில் கல்யாணம் ஆனதாம், அவனது தந்தைக்கு மிகதாமதமாக வாத்தியார் வேலை கிடைத்திருந்தது. எனக்கு தகவல் சொன்ன ‘விஜய் மணி’, மருந்து குடித்து இறந்திருந்தான். லச்சுமியை போல பல பெண்கள் அந்த் லாட்ஜின் சுவர்களுக்கிடையில் எய்ட்ஸை வாங்கி, தன் வாடிக்கையாளர்களுக்கு சொல்லிக்கொள்ளாமல் இறந்து போயிருக்கலாம். வாழ்க்கை ஓடிக்கொண்டே இருக்கிறது- ஓட்டல் இருந்த இடத்தில் எலக்ட்ரானிக்ஸ் கடை.

இடம், இடம் சார் மனிதர்கள், அதனூடாக பின்னிப்பினையும் அனுபவங்கள் அத்தனையும் இழந்து பெங்களூரில் குப்பை கொட்டும் நமக்கே இந்தவலி, பிரிவாற்றாமை இருக்கையில் ஈழத்து நண்பர்களை நினக்கையில் மனம் பாரமாகிறது. பொறுக்கவியலா வலி அது. கஜா ஓட்டல் வாழ்க்கை -இழந்த சொர்கம்.

எனக்கு தேவை உன் பிணம்.

2009-04-09T23:09:00.004+05:30

அலைகழிப்பின் பெருந்துயரப்

பயணத்தில் க்லங்கரை விளக்கங்கள்

காட்டுவது கரையேறிய

பின்தொடரும் வாழ்வின் குரூரங்கள்

கொலையின் சுவடுகளை

குருதிதோய்த்து வரையும்

உனக்கு தேவை இன்னும்

சில நூறாயிரம் நிணம்

எரிந்த உடல்கள்

பிறழ்ந்த உறுப்புகள்

புதைகுழிவாழ்க்கையின்

இருள்கவிந்த கனவுகள்

கண்ணீரால் சிதைமூட்டி

நீயே எரிந்து கொள்

சாம்பலில் உன் குருத்தெலும்புகள்

மீதமிருந்தால் பொறுக்கி

குவளையிலிட்டு ஊர்வலம்சென்று

ஓட்டாக்கி...

நீ என் இனம்.

உன் அவலங்கள் கவனிக்கப்படும்.

திறமையாக அரசியலாக்கப்படும்.

நான் உன் இனம்.

எனக்காக நீ மீண்டும் மீண்டும்

கொல்லப்பட மாட்டாயா?

பட்டினியில் இளைத்த உன்னுடல்

குண்டுதுளைத்து, விடவாயு கருக்கி

பற்கள் வெளித்தள்ள கொல்லப்படுவது

எனக்குநீ செய்யும் கைமாறில்லையா?

உனக்காக இரண்டுமுறை ஆட்சியை

துறந்தேன் அய்யகோ கூட்டணிமாறினேன்

உண்ணாவிரதத்தில் ஊண்சோறு உண்டேன்.

போரில் இறப்பு விதியென்றுரைத்தேன்.

உனக்கு இதுபுரியாது.

தெரிந்ததெல்லாம் கொல்லப்படுவது

அதில் செவ்வனே பங்குபெறு.

நான் உன் இனம்.

நீ என் இனம்.

எனக்கு தேவை

உன்பிணம்.

ஈரச்சருகு அட்டைகள் உறுஞ்சும் எழுத்து ரத்தம்

2009-04-01T08:11:00.007+05:30

எழுதும் ஆர்வம் குறைந்து வருகிறது அல்லது எழுதுவதற்கு ஒன்றுமில்லை. என்றுமே ஒன்றுமில்லாமல் போகாது, ஆர்வம் குறைகிறதே நிதர்சனம். எழுத்தில் எடுத்துவர முயன்று தோற்றது குந்தாத்ரியில் கேட்ட அதிகாலை பறவையின் பாடல். பறவைகள் பாடும் என்பதை கேட்டுனர்ந்த அந்த அதிகாலைப்பொழுது மிகவும் அலாதியானது.

பதிவுகளுக்கான இடைவெளிக்காலங்களில் எத்துணையோ நடந்துவிடுகிறது. நின்று நிதானித்து எழுத்துக்கான குறிப்புகளை விட்டுச்செல்லும் அமைதியில் நிகழ்வதில்லை அவை. இமைக்கும் பொழுதில் மறையும் காட்சியாய் நினைவின் அடுக்குகளில் மறைந்து தொலைகிறது. எடுத்த சில குறிப்புகளும் புரியாத ஆதியின் வரிவடிவத்தில் இருப்பதால், மொழிபெயர்ப்பின் இயக்க விதி எனக்கு கைவர மறுக்கிறது.

மிகவும் ரசித்து மகிழ்ந்த அனுபவம் எனில் ஆகும்பே காட்டில் எனைக்கடித்த அட்டைகள். அட்டைகளை நீங்கள் எதிர்கொ

ண்டிருக்க வாய்ப்புகள் குறைவு. உறுமீன் கொக்கு போல் ஊறும்கால் வரும்வரை ஈரச்சறுகுகள் நிறைந்த பாதையில் காத்திருக்கும் அவை. வழுவழுவென ஒரு புழுவின் தோற்றத்தை ஒத்த அவை ரத்தம் குடிக்கும் அழகே தனி. அருவெருப்பை போக்க அட்டைகளை சற்று தியானித்தேன். அதன் மேனியின் வரிவடிவங்களில் பெருக்கெடுக்கும் வாழ்வின் கேட்பாடுகளை, உந்துதல்களை அசைபோட்டேன்.

அட்டையின் வாழ்க்கை அதற்கு, அதை பிய்த்தெறிந்து அடுத்த அடியை வைக்கும் வாழ்க்கை நமக்கு. என் எழுத்தில் வாழ்ந்து மறையும் அட்டையின் வாய் உறுஞ்சும் ரத்தத்துளிகளில் நான் வாழ்ந்துகொண்டிருப்பேன் அட்டையின் அடர்காட்டு இருத்தலில் மற்றும் அதன் ரத்தம் தோய்ந்த தொகுநினைவுகளில்.

எழுதும் ஆர்வமும் அட்டை போலத்தான், நன் அனுபவங்களை உறிஞ்சி எழுத்தாக மாற்றும் ஒரு உந்துதல் அட்டையின் செயலை ஒத்ததாக இருக்கிறது. Erase Headல் வரும் குழ்ந்தையின் நினைவு வந்தது அட்டையை கண்டதும். David Lynch பைத்தியமா அல்லது நான் பைத்தியமா என தெரியவில்லை, எனினும் Blue Velvetஐ தரவிறக்கம் செய்துவிட்டேன். வார்தைகளால் நிகழ்த்திவிட இயலா படைப்புகளே படைப்பாளுமையின் அடுத்த நிலை என ஒரு குறிப்பு மனதில் ஓடிக்கொண்டே இருப்பதால், எழுதுவதற்கான ஆர்வக்குறைபாடு, நிகழ்வுகளை வார்த்தைகளில் தரமுற்பட்டு தோற்கும் சுணக்கமே எனக்கூறி அடுத்த காலுக்காக காத்திருந்தது அட்டை.

நாங்கல்லாம் ரவுடியாகி கால் மணி நேரமாச்சு..:)

2009-03-06T16:56:00.006+05:30

Right Place -Right Time அப்படின்னு ஒரு டயலாக்கை அடிக்கடி ஆங்கிலத்தில் போட்டு வாங்குவாங்க. ஏகப்பட்ட Usage இந்த மாதிரி இருக்கும். அவரவர் கற்பனைதிறனுக்கேற்ப புகுந்து விளையாடுவாங்க.

இத்தாலியன் கேரக்டர்ஸ், ஆப்ரிக்க அமெரிக்கர் இதில் சூரப்புலிகள். நம்ம எல்லோருக்குள்ளாரயும் ஒருவித கலைஞன், ஒரு போராளி, ஒரு குழந்தை என பல்வேறு முகங்கள் ஒளிந்திருக்கும் சட்டென ஒரு Right Time- Right Placeல் அது வெளிப்பட்டுவிடும். நமக்கே ஆச்சரியமாகி விடும்- நமக்கு இப்படியும் ஒரு முகம் இருக்கா என்று.

நேற்று ரொம்ப கடுப்பாகி டேமஜர ஏகப்பட்ட டேமாஜ் பண்ணிட்டேன். இருக்குற மந்தசந்தை(Dull Market) சூழ்நிலையில் இதெல்லாம் தேவைதானடா இசைன்னு ஒரு கணம் யோசிச்சாலும், அப்பப்போ ட்ரீட்மெண்ட் குடுக்கலன்னா பாஸ் நம்மள பெயிலாக்கிடுவா(ர்)னுங்க. அப்புறம் நமக்கு கீழ இருக்குற பாய்ஸ் நம்மள கேர்ல்ஸ் ரேஞ்சுக்கு பார்ப்பானுங்க.

நம்மோட அந்த சாதனையில் ஒரு கொல்டி டேமேஜரோட அலுவலக வாழ்க்கையை ரொம்ப டேமாஜ் பண்ணி.. அவர் இப்போ இந்தியாவுக்கு திரும்பி வர நெலமைக்கு ஆளாயிட்டார். ஆள் அப்படி ஒரு partiality பார்ப்பான். அமெரிக்கா போனாலும், தெலுங்கு, தமிழ், கன்னடான்னு நம்மாளுங்க திருந்தவே மாட்டாய்ஙக் போல. கொல்டி இப்போது பல்டி அடித்துக்கொண்டிருக்கிறார். When you rape, fucker be careful about your ass. யார் சொன்னான்னு ஞாபகத்துக்கு வரல, நான் சொன்னதாகவும் நீங்க Quote பண்ணிக்கலாம். :)

அதவிடுங்க, Jackie Brown பார்த்துட்டு இருந்தேன், Samuel Jacksons dialouge - My ass maybe dumb, but i'm aint a dumbass. எப்படி எப்பிடி இதெல்லாம்.. Murphys Lawல இந்தமாதிரி நெறய டயலாக் இருக்கு. நல்ல இண்டிரஸ்டிங் மொக்கை அல்லது நிதர்சனம்.

படத்த பாத்துட்டு, சாப்பிட போனேன், திரும்பி வரும்போது Water Melon (கலங்கிரி, தர்பீஸ்) வாங்கலாம்னு வண்டிய ஓரம் கட்டினேன். அந்த கடைக்கு பக்கத்துல வெள்ளரிக்கா வித்துட்டு இருந்தார் ஒருத்தர். அவரிடம் விளையாட்டய் வம்புபடித்துக்கொண்டிருந்த ஒருவர் அசால்ட ஒரு டயலாக் விட்டார். “நாங்கல்லாம் ரவுடியாகி கால்மணி நேரமாச்சு”...ஆஹா அருமையான மாடுலேசன்ல அதுவும் பெங்களூர்ல இப்பிடி ஒரு டயலாக்க கேக்க குடுத்து வச்சிருக்கனும்.

ஏதும் படத்துல் வந்திருக்கான்னு தெரியல ஆனா எனக்கு அவர் சொன்ன விதம், டயலாக் எல்லாமே ரொம்ப புடிச்சிப்போச்சி. அன்றாட மனிதர்களின் அற்புத வசனங்கள். இன்னபா டக்குன்னு தூயதமிளு..

ஹாஹஹ நாங்கல்லாம் பதிவராகி கால்மணி நேரமாச்சு போ போ...

கேட் வின்ஸ்லெட் ஆஸ்கர் வாங்கிய The Reader

2009-03-03T17:48:00.001+05:30

பெண்மையும் அழகும் ஒரு சேர அமைந்த நடிகைகள் மிகவும் குறைவு. Zero Size எலும்புக்கூடுகளுக்கு மத்தியில் பெண்மையின் நளினத்துடன் இன்ரும் வலம் வரும் கேட் வின்ஸ்லெட் டைட்டனிக் திரைப்பட கால கட்டத்தில் இந்த உலகின் கனவு தேவதை. நான் +2 படித்த கால் கட்டத்தில் அனைவரின் கனவுகளிலும் கேட் தான். டிகாபிரியோ சிகை அலங்காரத்துடன் என்னுடைய ரோசுக்காக கிருஷ்ணகிரி அரசாங்க குடியிருப்பு வளாகத்தில் காத்திருப்பேன். அதன் நேர் எதிர் இருந்த செண்டரல் பானாவிஷன் திரையரங்கில் வெற்றிகரமாக ஓடியது டைட்டானிக். மேலும்படிக்க க்ளிக்

Cinema Paradiso - திரைப்பார்வை

2009-03-03T14:50:00.005+05:30

திரைப்படங்கள் நம்முள் கிளர்த்தும் நுண்ணிய நினைவுகள்- நம் பெற்றோரோடு நாம் கண்டு களித்த முதல் திரைப்படம், நம் மனத்துக்கு பிடித்த நடிகர்கள், வசனங்கள், காட்சி அமைப்புகள், நட்பு வட்டாரத்துடன் சிலாகித்த திரைப்படங்கள், காதலியோடு பகிர்ந்து கொண்ட திரை நினைவுகள் என வாழ்வின் பெரும்பகுதியை நிரப்பி நிற்கும், துருத்தல்கள் இன்றி. மேலும் படிக்க இங்கு க்ளிக்கவும்

வீக் எண்ட் திரைப்படங்கள்

2009-03-02T08:34:00.003+05:30

வாரம் முழுவதுமே திரைப்படம் பார்க்கும் தொழில் செவ்வனே சொல்லவேண்டும் என்பதில் முனைப்புடன் இருக்கும் நான், வார இறுதியில் அதன் உச்சத்தை அடைவேன். அந்த வகையில் இந்த வாரம் -வார இறுதி அமோக விளைச்சல். முதலில் பட்டியலை பார்ப்போம்.

ஆங்கிலம்:

1. Training Day

2. The Wrestler

3. The Reader

தமிழ்:

1. காதல்னா சும்மா இல்ல

2. தீ

முதல் மூன்று படங்களின் மீதான பார்வை விரிவான தனிப்பதிவாகும் சாத்தியங்கள் கொண்டது எனினும் இங்கு ஒன்றிரண்டு வார்த்தைகள்.

Training Day: டென்சல் வாஷிங்டனின் அபாரமான ஆர்பாட்டமில்லாத நடிப்பில் ஒரு மறக்கமுடியா திரை அனுபவத்தை தருகிறது. வாஷிங்டன் ஆஸ்கார் வென்ற படம் இது. Simply Amazing.

The Wrestler: இந்த வருட ஆஸ்கர் தேர்வு, வெற்றிபெறவில்லை - SDMஐ விட பல மடங்கு நல்ல படம். சிறந்த நடிகருக்கான பட்டியலில் இருந்தார் Mickey Rourke. ஷான் பென் தட்டிச்சென்றுவிட்டார் விருதை. நல்ல திரையாளுமை, மிகவும் அமைதியான நடிப்பு, மிகைக் குரூரம் மற்றும் Inspiring. Mickey நிஜ குத்துசண்டை வீரர் என்பது பாத்திரத்தில் அவரை ஒன்றிப்போகச்செய்துள்ளது. சிறந்த நடிகருக்கான Independent Spirit Award கிடைத்தது அவருக்கு.

The Reader: இந்த வாரத்தின் சிறந்த திரைப்படம். கேட் வின்ஸ்லெட் அழகு தேவதையாக, சிறுபெண்ணாக டிகாபிரியாவுடன் டைட்டனிக்கின் என்ஜின் டெக்கில் ஓடும் அந்த் குரோம் லைட் காட்சி இன்னமும் என் கண்விட்டகலவில்லை. தேவதையே காற்றில் மிதப்பது போல் அழகாக ஓடுவார் கேட். அவரை துரத்தும் டிகாபிரியோ. செலூலாயிட் கவிதை.

அதே கேட் இன்று வயதுக்கேற்ற மாற்றங்களுடன், மிகவும் துணிச்சலாக நடித்து, இந்த வருட ஆஸ்காரை தட்டிச்சென்ற படம். இரண்டு குழந்தைகளுக்கு தாயானபின் நிர்வாண காட்சிகளில் மிகவும் லாவகமாக நடித்துள்ளார். எப்போதும் ரகசியத்தை சுமந்து திரியும் முகம், வெகுளியின் பிடிவாதம் அல்லது முரட்டுத்தனம், காதல், தனிமை, கோபம் என உணர்ச்சிகளை செதுக்கிச் சென்றுளார். இப்பொழுதும் கேட் அழகுதான். கயல் எழுதி வில் எழுதி காமன் செயல் எழுதி தீர்த்த முகம் திங்களோ... கேட் Congrats for Oscar. You deserve it.

தமிழ்:

காதல்னா சும்மா இல்ல: மோட்டர் சைக்கிள் டைரி சாயலில் வந்திருக்கும் லோக்கல் தெலுகு படம், அதன் தமிழ் மொழிமாற்றம். அருமையான முயற்சி. கட்சியமைப்பில் சற்று கவனம் செலுத்தி, கதைக்களத்தின் தீவிரத்தை கூட்டி இருந்தால் அசாத்தியமான திரைப்ப்டைப்பாக உருப்பெற்றிருக்கும். ரவி கிருஷ்ணா பின்னி பெடல் எடுக்கிறார். செல்வ ராகவனின் தேர்வல்லவா.. டைமிங் இவரது பலம். பல்வேறுபட்ட அடிப்படை மனித இயல்புகளை தொட்டுச்செல்கிறது படம். நல்ல முயற்சி.

தீ - பீ

ஒப்பாரியில் கரையும் சுயம்

2009-02-28T20:28:00.006+05:30

வலியின் உக்கிரத்தை தூண்டும் பாடலொன்று எப்போதும் கசிகிறது என் புலன்களில் வழியே. கேட்கும் விருப்பமிருந்தால் துக்க அனுசரிப்பின் ஆயத்தங்களுடன் என் கதவை எப்போது வேண்டுமானாலும் தட்டுங்கள். உங்கள் ரணங்களுக்கு மெருகூட்டும் பாடலின் வரிகளை என் ஒப்பாரியின் கையேடு தாயாராகவே வைத்திருக்கிறது.

ஸ்ரீரங்கத்து வதைகள்

2009-02-28T11:37:00.005+05:30

நீர்ப்பிரதியின் முகப்பில் இருக்கும் புகைப்படம் திருவரங்கத்தில் எடுத்தது. சனவரி 23 மாலை அன்று திருச்சியில் இருந்து திருவரங்கம் சென்றோம் நானும் நண்பனும். திருவரங்கம் செல்லலாம் என நான் சொன்னது அவனுக்கு வியப்பளித்திருக்கலாம். திருச்சியின் கட்டுமான வசதிகள் மிகவும் அடிப்படை நிலையில் இருந்தது. ஆங்காங்கே நால்வழி சாலைகள் ஆரம்பகட்டத்தில் நடந்துகொண்டிருக்கிறது.

கோயில்கள் பழந்தமிழ் கட்டிடக்கலையின் வாழ்ந்துகொண்டிருக்கும் சான்றாதலால் கிடைக்கும் சந்தர்ப்பங்களை தவற விடுவதில்லை நான். உலகிலேயெ உயரமான ராஜகோபுரம் என தம்பட்டம் அடித்தாலும் அழகியல் துறையில் மிகவும் தட்டையாக இருந்தது அந்த கோபுரம். ரசனை கிலோ என்ன விலை என கேட்கும் வண்ணங்களை வாரி இறைத்து ஒரு ரங்கோலி விளையடி இருந்தார்கள்.

From srirangam

தஞ்சாவூர் கோயிலை விட உயரச்செல்ல வேண்டும் என்ற ஒற்றை நோக்கத்தில் 87ல் 73மீட்டருக்கு உயர்த்தி இருக்கிறார்கள். கலைநயத்தில் அதன் நூற்றிலொரு பங்கும் இல்லை. திருவரங்கம் ஒரு தீவு. நடந்தாய் வாழி காவேரி என அழகுநடை போடுகிறது காவிரி. வெவ்வாறு நிலைகளாக சுஜாதாவின் திருவரங்கம் நம் கண்முன் விரிகிறது. 7 வீதிகளுடன் ஒரு ஊரையே உள்ளடக்கி, பரபரப்பான கூட்டத்துடன் நிலையான தொழில்கூடம் போல செயல்படுகிறது திருவரங்கம்.

கன்னடம் அதிகம் கேட்கக்கிடைக்கிறது. கோவிலின் சுவர்களில் திரும்பிய பக்கமெல்லாம் கன்னட கல்வெட்டுகள். என்னுடன் வந்திருந்த நண்பன் கன்னட தேசத்தவன், சில வரிகளை வாசித்து காண்பித்தான், பழைய கன்னடமும் பல இடங்களில் செதுக்கப்பட்டிருந்தது(15 நூற்றாண்டு வரை அவர்களுக்கு பழைய கன்னடம் தான்). பெரும்பாலான கோவிலை கட்டியது ஒய்சாலர்கள் என்பதால் கன்னடம் பொங்கி வழிகிறது. காவிரிக்கரைகளின் கன்னட தொடர்பு இங்கு எண்ணிப்பார்க்கப்பட வேண்டியது தான்.

சுஜாதாவின் திருவரங்கத் தேவதைகள் அந்த ஏழுதெருக்களில் விளையாடி கவிபாடி காதல் கொண்டு மூப்பெய்தி அவரைப்போலவே மறைந்திருக்கலாம். அர்ச்சகர்களின் மதிப்பிற்கேற்ப தெருக்களும் அவர்களுக்கான வீடுகளும் ஒதுக்கப்பட்டிருக்கலாம். ராமானுஜரின் கோவிலிலேயே ஆரம்பித்தது தொல்லை, வழிபடாமல் திரும்பிய என்னை நீ முஸ்லீமா என கடுப்படித்தார் ஒரு அர்ச்சகர். முறைத்துவிட்டு அமைதியாக திரும்பினேன், மனதில் இவ்வளவு வன்மத்துடன் இவர்களெல்லாம் என்ன பூஜை செய்கிறார்களோ. ராமானுஜரின் பூத உடல் இன்னமும் அங்கு அப்படியே இருப்பதாக கதை விட்டர்கள். சிலையை பார்த்தால் அப்படி தெரியவில்லை. Dehydrated Mummies அவ்வளவு பெரிதாக காண வாய்ப்பில்லை.

ஆண்டாளின் அழகு தமிழ் ஒரு இடத்தில் காணக்கிடைத்தது. உள்ளே நுழைந்த முதல் நொடி கண்ணில் பட்டது சில்லறைகளை கொட்டி எண்ணும் மண்டபம். Symbolic Representation of their motives.

From srirangam

உள்ளே நுழைந்து தேடிய இடமெங்கும் தட்டையான தூண்கள், 22 கோபுரங்கள் இருப்பதாக சொல்லிக் கொண்டாலும் there is no design flow or patterns between the temples or pillars or the structures. தேடினாலும் கிடைக்காது போல.

கருவறை செல்ல பெருங்கூட்டம், 100 ரூபாய் கொடுத்தால் கொஞ்சம் தூரம் நடந்து சென்று தரிசனம், 50 கொடுத்தல் பாதி தூரத்தில இருந்து நடக்க வேண்டும், 25 கொடுத்தால் ஆரம்பத்தில் இருந்து நடை. காசே தான் கடவுளடா. ஒரு நேர்கோட்டில் சொன்று வழிபாடு முடித்து திரும்புவதை விட்டு, U டர்ன் அடித்து அடிக்க வைத்து வைத்து பணத்தை கறந்துவிடுகிறார்கள். அந்த நடைபாதையெங்கும் வழிப்பாடு சீட்டுகளை கூவி கூவி விற்றுக்கொண்டிருந்தார் ஒரு தாத்தா. என்னவிதமான வழிபாடு என தெரியவில்லை.

அதிகப்படியான கமெண்டுகளை அடிக்க ஆள் சிக்கவில்லை, நண்பன் பணப்பிடுங்கலில் கடுப்பாகி இருந்தாலும் வழிபாட்டில் கவனமாக இருந்தான். கன்னடர்கள் கட்டிய கோவில் என பக்தி மேலோங்கிவிட்டது அவனுக்கு. கருவறையில் பெருமாள் சிலை இருந்தது. வழிபடாமல் சென்றதாலோ அல்லது காசு போடாததாலோ மறுபடியும் நீ முஸ்லீமா என்ற கேள்வியை எதிர்கொள்ளவேண்டி இருந்தது. பிரச்சனை எதற்கு என நண்பன் எனை தள்ளிக்கொண்டு வந்துவிட்டான்.

அர்ச்சகர்கள் குளிப்பதில்லை, அவர்கள் பக்கத்தில் வந்தால் வாந்தி வருவது போல இருக்கிறது என அவன் குறைபட்டுக்கொண்டான். ஆடையின்றி திருவரங்கத்து தெருக்கள் முழுவதும் திரும்பும் அவர்கள் வந்தால் 10அடி தள்ளி ஓடினோம். பிராமணர்களை “ பொம்மன்” என அழைப்பார்கள் கன்னடத்தில். பொம்மன்கள் இங்கு மிகவும் மோசம், ஒருவேளை மைசூர் பொம்மன்களிடம் இருந்து இவர்கள் குளிக்காத பழக்கத்தை கற்றுக்கொண்டிருக்கலாம் என்றான்.

திருச்சி நண்பி சொன்ன தகவல் அவர்களின் நாற்றத்திற்கான விடையை தந்தது. திருவரங்க வீதிகளை நிறைக்கும் வீடுகளில் கழிவறை இல்லையாம். பொதுகழிப்பறை போன்று ஒரு இடம் இருக்குமாம், அங்கு இருந்து வைத்துவிட்டு வந்துவிடுவார்களாம், அதை வந்து கார்பரேசன் அள்ளிச்சென்றுவிடுமாம். ஒட்டுமொத்த அரங்கமும் இப்படியே இயங்குகிறதாம். ஸ்ரீரங்கத்து தேவதையான ஒரு நண்பியின் வீட்டிற்கு சென்ற அவர் ஒருவழியாக அந்தவீட்டை விட்டு விட்டால் போதும் என தெறித்தோடிவிட்டாராம்.

இதைகேட்ட பின் திருவரங்க காற்று ஒருவித இம்சையை தர ஆரம்பித்துவிட்டது. என் தமிழ் தேடலுக்கு மருந்தான ஒரே காட்சி பெரியார் கொளுத்த முயன்ற கம்பராமாயணம் அரங்கேறிய கம்பர் மண்டபம்.

From srirangam

அரங்கேற்றத்திற்கென சோழன் வடித்திருந்த அந்த மண்டபம் நல்ல கலைநயத்துடன் விளங்கியது. சற்று நேரம் அமர்ந்து அந்த கால காட்சிகளை மனதில் ஓடவிட்டேன், ஓலைச்சுவடிகளுடன் உள்ளே நுழையும் யானை, கம்பன், சோழராஜன்... Vinatage feelings are soulful.

மாலிக்கபூரின் மகள் துலுக்க நாச்சியாருக்கு கோயில் இருக்கிறது இங்கே எனினும் ஏன் முஸ்லீமா என எனை வன்மத்துடன் கேட்டனர் என தெரியவில்லை. தாயார் கோவிலில் இந்துவல்லாதவர்கள் அனுமதி இல்லை. என்ன லாஜிக் என தெரியவில்லை. சொர்க வாசல் கதைகளை காதில் கேட்க முடியாதவாறு திருச்சி நண்பர்கள் அவிழ்த்து விட்டார்கள்.

தேவதைகள் எங்கும் தென்படவில்லை. நிறைய சோடாபுட்டி பெண்கள் சைக்கிள் ஸ்கூட்டி என விரைந்து கொண்டிருந்தனர். சோடபுட்டி தேவதைகளின் நிரந்தர அடையாளம் என நண்பன் சொன்னான். சுஜாதாவின் பார்வையில் அது ஒரு அழகிய பூமியாக இருந்திருக்காலாம்,

“கயல்எழுதி வில்எழுதிக் கார்எழுதிக் காமன்

செயல் எழுதித் தீர்ந்தமுகம்திங்களோ காணீர்” என அங்கு திரிந்த தேவதைகளின் மடியில் அவர் தன் பிறப்பின் பயனை அடைந்திருக்கலாம் மறுப்பதற்கில்லை.

ஸ்ரீரங்கம் அதற்கான அனைத்து சாத்தியங்களுடன் ஆர்பாட்டமாக இருந்தாலும், அதன் பின் இழையோடும் சாதிய, மனித வன்கொடுமைகள் என்னை அந்த இடத்தை அவ்வளவாக ரசிக்க அனுமதிக்வில்லை. கோவில் ஒரு பெரும் ஏமாற்றம். அழகியலின் துவக்கத்தை கூட அங்கு காண முடியவில்லை. மாலிக்கபூருடன் போரிட்டு மடிந்த வீரவைஷ்ணவர்களின் தாக்கம் சில தூண்களில் தெரிந்தது. கையில் வாளும் இடையில் உறையும் குறுவாள் நெற்றியில் நாமம் சில செதுக்கல்களை கருடழ்வார் மண்டபத்தில் காணமுடிந்தது.

ஒரு வியாபாரி அல்லது வைசியர் கோவிலுக்கு அளித்த தான பத்திர கல்வெட்டு மிகச்சரியாக செம்மண் அல்லது சுண்ணாம்பு கலவையில் அழிக்கப்பட்டிருந்தது. அதையும் தாண்டி பளிச்சிடுகின்றன. பல்வேறு ராஜாக்கள், குறுநில மன்னர்களின் முயற்சியில் கோயில் எழுந்து நின்றாலும் அதை தாங்கள் தான் கட்டினோம் என சொந்தம் கொண்டாடுகின்றன அர்ச்சகர்கள்.

அனைத்தையும் காலம் காலமாக கண்டு மனம் வெதும்பி, ஒடிந்து போய் சிறுஓடையென ஓடிக்கொண்டிருக்கிறது காவேரி. அவள் மனக்குறை தீர்க்கும் விதமாக பெரியார் முன்னெடுத்த போராட்டங்களின் பயனாக திருச்சி ஒரு திமுக கோட்டை என்றாகிவிட்டது. அதற்கான முழுமுதல் காரணம் ஸ்ரீரங்கமாக இருக்கும் என்பதில் எந்த ஐயமும் இல்லை. பயணத்தில் நான் மிகவும் தவறவிட்ட ஒன்று ராஜகோபுரத்தின் முன் நிறுவப்பட்டிருக்கும் பெரியாரின் வெண்கல சிலை. திருச்சி வந்துசேர்ந்த பின் அந்த தகவலை நண்பர்கள் சொன்னார்கள். கற்கண்டாய் இனித்தது செய்தி.

சொர்கவாசல் திறப்பின் போதெல்லாம் திகவினர் தெருமுனை கூட்டங்கள் நடத்தி அலப்பறை செய்வதாக நண்பர் சொன்னார். கேட்கவே நன்றாக இருந்தது. ஹஹஹ.

கோவில் விட்டு காவிரி கரைக்கு வந்தோம். ஆற்றின் படுகையில் காவிரி தாய்க்கு கோவில். அதுதான் ஆற்றில் காவிரி ஓருகிறதே இங்கே எதற்கு கோவில் என்றேன், பிழைப்பில் மண் விழுவது கண்டு ஒரு அர்ச்சகர் கைபிசைய நண்பன் 10ரூ கொடுத்து அவரை சந்தோசப்படுத்தினான்.

தலைகாவிரி, நிசர்கதம்ம, ஒகேனக்கல், சிவசமுத்திரம் என காவிரியை பல இடங்களில் பார்த்திருந்தாலும் அந்த மாலை வெயிலில் காவிரியை கண்டது மனதுக்கு இதமாக இருந்தது. அப்போது கிளிக்கியது தான் முகப்பில் இருக்கும் புகைப்படம்.

மருங்குவண்டு சிறந்துஆர்ப்ப

மணிப்பூ ஆடை அதுபோர்த்துக்

கருங்க யல்கண் விழித்துஒல்கி

நடந்தாய் வாழி காவேரி

From srirangam

பூவார் சோலை மயில் ஆலப்

புரிந்து குயிலகள் இசைபாடக்

காமர் மாலை அருகுஅசைய

நடந்தாய் வாழி காவேரி. (சிலப்பதிகாரம் - மாதவியின் கானல்வரி பாடல்கள்)

ஸ்ரீரங்கத்து தேவதை இவள் மட்டுமே, சீரிளமைக் காவிரிப்பெண்.

From srirangam

கோடையின் வாடை

2009-02-28T10:37:00.004+05:30

பரிதி பட்டையக் கெளப்பும்

நெடுங்கோடையின் கதிர்க்களென

எனைத்துளைக்கும் உன்பார்வையின்

அர்த்தம் என்னான்னு தெரியல

மோட்டுவளை வெட்கத்தில் முகம்திருப்பும்

என்வெறித்த பார்வையின் தீவிரம்கண்டு

ஆமா எப்போ வீட்லருந்து கெளம்பற?

முடிவின்றி தொடரும் பாதையின்

பெயரற்ற பயணியாய் உனைச்சேரும்

மூர்கத்துடன் வெறித்து நோக்கியதில்

பெருங்களைப்புற்று பரிதியும் மட்டையானது.

வெடித்துச் சிதறிநிலம் தாவும்

விதைகளின் உள்ளுறையும் மரத்தின்

இலைகளில் முகம்பார்க்கிறது

இலையுதிர் காலத்து இலைகள்.

இன்னா வெயிலு? அல்லது

உன் காதலால் மெண்டல் ஆனேன்.

மாற்றங்களின் சுவடின்றி

பூத்துநிறையுது தொட்டிச்செடி.

முயன்று அடையாளம் கண்டதில்

உன்போலவே பூக்களின் மீதும்

கோடையின் வாடை.

சுயேட்சைகளுக்கு வாக்களித்து தேர்தலை புறக்கணியுங்கள்

2009-02-27T09:50:00.005+05:30

உலகே ஒருவித மனக்குமுறலுடன் உற்று நோக்கும் நம் இன்னல்களுக்கான ஆதரவும், போராட்டமும், தியாகங்களும் நாம் எதிர்பார்க்கும், நம்மை பிரதிநிதித்துவப்படுத்தும் அரசியல் தலைமைகளிடம் இருந்து வரவில்லை என்பது நாம் கண்டுகொண்ட அதிர்ச்சியான உண்மை. இனமான சுயமரியாதை இயக்கங்களின் ஆணிவேரில் ஆட்சிவெறி என்னும் சுயநல புழுவடித்து நாட்களாகிவிட்டாலும், அதன் மேற்பரப்பில் கண்ணுற்ற நாடகப்பச்சை நம் மக்களின் நலனில் அக்கறை கொண்டதல்ல, அது பச்சோந்தித்தனம் என கடந்த ஆறுமாத கால அரசியல் நடவடிக்கைகள் நமக்கு புலப்படுத்தி விட்டது.

ஈழமக்களின் இன அழிப்பு பாதகங்களை முன்னெடுக்க மீண்டுமொரு மைய அரசை தேர்ந்தெடுக்க வீட்டுக்கு ஆயிரமோ ஐநூறோ வாங்கிக்கொண்டு வரிசையில் நிற்கும் நாள் தூரத்தில் இல்லை. துரோகம் நம் நெடியவரலாற்றின் ஒதுக்கமுடியா அங்கம், அவர்களை இனங்கண்டு அவர்களுடனே உறவாடும் கீழ்நிலை அரசியல் கண்டு வெறுப்புற்று, வாக்களிப்பதை புறக்கணிக்க முடிவெடுத்துவிட்டிருப்பீர்கள்.

தேர்தல் களம்:

காங்கிரஸின் முதுகில் குத்தும் அரசியலை கண்ணுற்ற பாஜக’வும் ஈழப்பிரச்சனையில் பெரிதாக கவனம் கொண்டாற்போல் தெரியவில்லை. அவர்கள் நன்கறிவார்கள் அவர்களுக்கான களம் தமிழகம் அல்ல என்று. அதிமுக’வும் தூரம் திமுகவும் தூரம். தனித்து நின்றால் தற்கொலை. அவர்களின் தேர்தல் திட்டத்தில் தமிழகம் ஒரு மறக்கப்பட்ட மாநிலம்.

காங்கிரசுக்கு வாக்களிப்பது இனி கனவிலும் நினைத்துப்பார்க்க இயலாத ஒன்று. தேர்தலை தாண்டி தனிப்பட்ட புறக்கணிப்பு பட்டியலில் இடம்பிடிக்கும் முதல் வார்த்தையாகிவிட்டது காங்கிரஸ். அவர்கள் எந்த கட்சியுடன் கூட்டணி அமைத்து வந்தாலும் அந்த முடிவு மாறப்போவதில்லை. சோனியாவோ அல்லது காந்தி குடும்பத்தினர் தலைமையில் இருக்கும் வரை அந்த கட்சிக்கு வாக்களிப்பது இயலாத செயலாகிவிட்டது நமக்கு.

தேர்தல் புறக்கணிப்பு:

நாம் ஓட்டு போடாமல் விட்டால் என்ன நடக்கும்? நம் பெயரில் கள்ள ஓட்டு அரங்கேறும். யாருக்கும் வாக்களிக்க விருப்பமில்லை என வீட்டில் இருப்பது ஒரு பயனும் அளிக்காது. அனைத்து தொகுதியிலும் மூன்றாம் தர நான்காம் தர கட்சிகள் சிலது இருக்கும் அல்லது சுயேட்சைகள் நிற்பார்கள். அவர்களுக்கு ஓட்டளிப்பதும் இந்தக்கட்சிகளை புறக்கணிப்பதும் அல்லது தேர்தலை புறக்கணிப்பதும் ஒன்று தான்.

எனவே உங்கள் பொன்னான வாக்குகளை சுயேட்சைகளுக்கு வாக்களித்து இந்த தமிழின எதிரிகளின் ஆட்டங்களை முடிவுக்கு கொண்டு வருவோம். நாற்பதை கொடுத்தும் நாம் கண்டது இன

அழிப்பு, அதை எதிர்க்கும் திரணியற்ற அலிக்கூட்டம். திராவிட கட்சிகளின் வாய்சவடால்கள் பல் இளிக்க ஆரம்பித்துவிட்டது. அவர்களின் மீதான நம்பிக்கை தகர்ந்துவிட்டது. 60களில் இருந்து கழக் ஆட்சிக்கு வாக்களித்த கண்மணிகளுக்கு இந்த தேர்தல் ஒரு கடும்போராட்டம் தான். எனினும் நடவடிக்கைகளுக்கு அப்பாற்பட்ட கட்சிகள் எதுமில்லை. தேர்தல் தோல்வியை படிப்பினையாக தந்து அவர்களின் சுயநலப்புரையோடிய கண்களை திறப்போம், திறக்க மறுத்தால் குருடாக்குவோம்.

இந்த தேர்தல் புறக்கணிக்கப்படவேண்டிய தேர்தல். மக்களாட்சியில் நம்பிக்கை கொண்டு சுயலநலவாதிகளின் கொடுங்கோலாட்சிக்கு துணைபோகிறோம் நாம். சுயேட்சைகள் வெற்றிபெற்றாலாவது கொஞ்சம் சூடு சுரணையுடன் நடந்து கொள்வார்கள். பதவி அவர்களுக்கு தோளில் போடும் துண்டாக மட்டுமே இருக்கும். மாநிலத்தின் நலன் மறந்து மத்தியில் சோரம்போகும் இந்த கட்சிகளுக்கு பாடம் புகட்டும் வாய்ப்பு நமக்கு வாய்த்திருக்கிறது. இது ஒரு தீர்வல்ல, குறைந்தபட்சம் பழிவாங்கவாவது ஒரு வாய்ப்பு. மத்திய கட்சிகளை துடைத்தெறிந்து இயக்க கழக குருடர்களுக்கு அதிர்ச்சி வைத்தியம் அளிப்போம்.

பெரியோர்களே தாய்மார்களே உங்கள் பொன்னான வாக்குகளை ஏதோ ஒரு சுயோட்சைக்கு அளித்து மனநிறைவுடன் உறங்குங்கள். ஆயிரங்கள் உங்கள் கதவுகளை தட்ட காத்திருக்கிறது. அனைத்தைவும் வாங்கிக்கொண்டு வாக்குகளை சுயேட்சைகளுக்கு குத்துங்கள். அவர்கள் உங்களைப்போலவே பாவப்பட்ட வேட்பாளர்கள். கோடிகளை இறைக்க அவர்களால் இயலாது. அவர்களுக்கு நீங்கள் அளிக்கும் வாக்கு, மக்களாட்சி முறையில் நம்பிக்கை கொண்டு, அதிகார பீடங்களை எதிர்த்து நிற்கும் அந்த சாமான்யனின் கனவுகளுக்கு உரமூட்டுவது.

எனவே மறந்தும் இருந்து விடாதீர்கள், இருந்தும் மறந்து விடாதீர்கள். உங்கள் ஓட்டு சுயேட்சைகளுக்கே.

இசையின் அரசியல் - அவமதிப்பின் எல்லைகள்

2009-02-26T14:02:00.013+05:30

என் படைப்புகள் உலகிற்கானது எனும் பரந்த தளத்தில் இயங்குபவனே உண்மையான படைப்பாளி. நிகழ்தகவாய் அவனுக்கு வாய்க்கும் சந்தர்பங்களும், ஆற்றூநீராய் அனுதினம் தன்னை புதுப்பித்துக்கொள்ளூம் வளர்சிதை மாற்றங்களும் அவன் இருப்பை நிலை நிறுத்துகின்றன.

அனைவரும் ஒருவித அரசியல் பார்வையுடன் இயங்கவேண்டும் என எதிர்பார்ப்பது வன்முறையான சிந்தனை. மனிதன் அல்லது படைப்பாளி அல்லது ராஜா, ரகுமான் அனைவரும் தம் சூழலின், குடும்ப பின்புலத்தில், சமுதாய நெருக்குதல்களின் அடிப்படையில் கட்டமைக்கப்பட்ட நம்பிக்கைகள் மற்றும் வாழ்க்கை முறைசார்ந்து தங்களை வெளிப்படுத்துகின்றனர். ராஜாவின் இந்துத்துவ துதிகளை ஆன்மீக புரட்டுகளை அல்லது நம்பிக்கைகளை சாடாதவர்கள் ரகுமானின் தேசீய இயங்குதளத்தை கேள்விக்குள்ளாக்குவது நகைப்பிற்குறியது.

தேசிய இயங்குதளத்திற்கான சாதனமான அல்லது வட இந்திய இயங்குதள சாதனமான ஹிந்துஸ்தானி ரகுமானுக்கு மிக இலாவகம், ராஜாவின் கிராமிய மற்றும் கர்நாடக சாதனங்களைப்போல. இசுலாமியராக இருப்பது மொழியளவில் அவருக்கு வட இந்திய சந்தையின் நுணுக்கங்களை எளிதில் கற்றுக்கொடுத்துவிட்டது.

அடிப்படையில் கற்றல் மற்றும் வளர்சிக்கான காரணிகளை ஒரு கலைஞன் எவ்விதம் எதிர்கொள்கிறானோ அது சார்ந்து அவன் சாதனைகள், படைப்புகள் அமைகின்றன. சமுதாய அரசியல் மற்றும் தத்துவ விசாரனைகளின் மாயைகளில் தொலைந்துவிடாமல் தன் படைப்பு சார்ந்து இயங்கிக்கொண்டே இருப்பதே அவன் அடையாளம்.

ஆன்மீக ஆழத்தில் சிக்கிக்கொண்ட ராஜா- அவரை சித்தி முத்தி எனும் அளவுக்கு ஏற்றிவைக்கும் ஊடகங்கள், அவரின் அந்தகைய அடையாளங்களுக்கு தூபம்போடும் பார்ப்பன அமைப்புகள் என ஒருவித புனிதபிம்பத்தை கட்டமைத்துவிட்டார் இளையராஜா. தென்றாலாய் நமைவருடிய பண்ணைபுரத்து கூதக்காத்து இன்று சாம்பிராணிப்புகையாய் மூச்சடைக்கிறது. அந்தகைய புனிதபிம்பங்களின் அடிப்படைகளை கட்டுடைத்து ஒரு இசுலாமிய இளைஞனும் இந்திய இசைவடிவங்களின் சூட்சுமங்களில் விளையாட முடியும் என நிரூபித்து வெற்றிகண்டிருப்பது நம் அஜீரணத்துக்கான காரணம்.

அனைத்து படைப்புகளும் அரசியல் அல்லது ஒருவித செய்திதாங்கி இயங்க, இசை மட்டுமே அனைத்து விதமான கட்டுக்களையும் உடைத்து ஒருவித மயங்கியல் ஒருமைப்பாட்டை மனிதனுள் ஏற்படுத்துகின்றது. எண்ணங்களின் அல்லது உணர்வுகளின் ஒருங்கமைவு என அறிவியல் படுத்தி விட்டாலும் அதன் போதை வீரியம் மிக்கது. ஒரு படைப்பாளியை நெருக்குவது அவன் கனவுகளை சிறைபிடிப்பதைப் போன்றது.

தமிழில் எதைச்சொன்னால் என்ன? திருக்குறள் சொல்லியே ஆகவேண்டிய அவசியம் என்ன? பேருந்து தோறும் எழுதியிருக்கும் திருக்குறளால் ஆன பயன் என்ன? படிப்பின் வாசம் பெரிதுமற்ற ரகுமான் திருக்குறளை சரிவர அறிந்திராததால் கூட சொல்லாமல் போயிருக்கலாம், ராஜா எத்துணை மேடைகளில் திருக்குறளை சொல்லி இருக்கிறார்?

கலைஞர்களின் சுதந்திரத்தை பாதுகாப்பது நம்முன் இருக்கும் தலையாய கடமை. ராஜாவாகட்டும் ரகுமானாகட்டும், அல்லது தெருக்கூத்து கலைஞர்களாகட்டும் அவர்களுக்கான இயங்குதளத்தை எந்த கட்டுப்பாடுகளுமற்று உறுதி செய்வதே ஒரு வளர்ந்த சமுதாயத்திற்கான ஆரோக்ய அடையாளம்.

ராஜாவின் இடம் கனவிலும் பிரியா இடத்தை தமிழ் பண்பாட்டில், சமுதாயத்தில் நம் இசைவடிங்களின் அடைப்படையாய் நிலைத்துவிட்டது. எந்த ஒரு கலைஞனும் ராஜா என்ற அளவையின் படியே அளக்கப்படுவதே அவரின் நீள அகலங்களை நமக்கு உணர்த்துகிறது. மொசார்ட்டும், பீத்தோவானும் ஆஸ்கார் வாங்கவில்லை என்பதால் அவர்களின் மேதமைத்தன்மை என்றைகாவது கேள்விக்குட்படுத்தப்டுகிறதா? வர்த்தகம் தாண்டிய படைப்பாளுமையும், வாழ்வியல் பாதிப்புகளும் ராஜாவின் இருப்பை என்றோ சமைத்துவிட்டது. ரகுமான் தமிழ்மண்ணின் மைந்தன் எனினும் தமிழிசையின் ஆளுமையா என்றால் ஏமாற்றமான பதிலே மிஞ்சும்.

ரகுமானின் விருதுகள் நமக்கு பெருமையே. ஆனால் ராஜா என்றென்றும் நம் இசைவடிவத்தின் ஆணிவேர். எம்முன்னோர்களின் தோள்மீதமர்ந்து இந்த உலகை காண்கிறேன் என்ற ஐசக்நியூட்டனை போல, ரகுமான் தன் இசைமுன்னோர்களின் தோள்மீதர்ந்து உலகின் மேடைகளை அடைந்திருக்கிறார்.

மாயா அருள்பிரகாசத்தின் துணிச்சலோ அரசியல் பார்வையோ, களப்பின்புலங்களோ அறிந்திராத ரகுமான் இரவல் குதிரையில் நிரந்தர வெற்றியாளன் என்றாலும், நம் அடையாளமாய் மிளிர்வது ராஜா, அரசியல் அடையாளமாய் ஓங்கி ஒலிப்பது மாயா அருள்பிரகாசம். தமிழனின் எவ்வகை வெற்றியெனினும் அது நமக்கு மகிழ்ச்சியே. ரகுமான் ஆஸ்கர் வாங்கிய அன்று அலுவலகத்தில் அனைவரும் எனக்கு வாழ்த்து தெரிவித்தனர். ரகுமான் தமிழன் என்பதாலேயே அது. ரகுமானின் இசையில் பெரிய பிடிப்பு இல்லை என்றாலும், என்னை புல்லரிக்கச் செய்த கணங்கள் அவை.

ராஜாவை தூற்றும் சிலர், ரகுமானை தூற்றும் சிலர் - ஆரோக்கியமில்லை அது. தாராவியின் துயரங்களுக்கு ஓட்டுபோட்ட அரசியல்வாதியிடம் தீர்வை கேட்காமல், ரகுமானை கேள்வி கேட்கும் அரைகுறைகளை என்னென்று சொல்வது. வணிகம், சந்தைபடுத்தலின் குழந்தை ரகுமான், பல நாடுகள் பல மேடைகள் என அது பரவும். ராஜா நம் அனுதின அமைதிக்கான தேடல். அவரவர் தளங்களில் தன்னியல்பு மாறாமல் அவர்கள் வீறுநடை போடட்டும், தமிழனுக்கு அதுபோதும். கோடிகள் கொட்டிக்கொடுத்தாலும் சென்னையை விட்டு நகராமல் அனைவரையும் இங்கு வரவைக்கும் ரகுமானின் தமிழுணர்வுகளை கேள்விக்குள்ளாக்குவது அந்த அப்பாவிக்கலைஞனை பாரபட்சத்துடன் நடத்துவதாகும். இந்துத்துவ வெறியர்களின் ஊதுகுழல்களே அத்தகைய செயலை முன்னெடுத்துக்கொண்டிருக்கின்றன. தமிழுணர்வாளர்கள் ஆய்ந்தறிந்து அதை முறியடிக்க வேண்டும்.

வாழ்த்துக்கள் ரகுமான்.

பதிவுக்கொலை அல்லது பிரதிகளை அழித்தல்

2009-02-25T11:21:00.007+05:30

இரண்டாண்டுகளாக எழுதிய பதிவுகளை அழிப்பது குறித்த எந்த குற்றவுணர்வுமின்றி இன்று அதிகாலை அனைத்து பதிவுகளையும் கொலை செய்துவிட்டேன். இதுவரை என் முகவரி அறிந்தவர்கள் நினைவில் உயிர்த்திருக்கும் வெவ்வேறு காலச்சூழல் சார்ந்த கருத்துப்பறிமாற்றப் பிரதிகளாய் திகழ்ந்த அப்பதிவுகள் உயிர்கொண்டு என்னை ஒருநிமிடம் தீர்க்கமாக நோக்கினாலும், மன்னிப்பு கேட்டு மன்றாடவில்லை, கண்ணியமாக மரித்துப்போனது.

பிரதிகளை கொலை செய்யும் ஆவல் உங்கள் அனவைருக்கும் இருக்கலாம், தீவிரமாக யோசிப்பவர்களின் மூளையை பிறழச்செய்யும் திறன் கொண்டவை அப்பிரதிகள் எனவே திடமாக முடிவெடுத்து ஒரு நொடியில் அழித்து விடுங்கள். எப்போதும் நீங்கள் வாழ்ந்த வீடுதான், இன்று திடீரென தன்னை வெறுமையாக்கி உங்களுக்கு போக்கு காட்டுகிறது, உங்கள் வீடு எப்போதும் உங்கள் வீடாகவே இருப்பதன் சலிப்பை அறியாதவரா நீங்க?

பள்ளிச்சிறுவனின் டிரவுசர் பாக்கெட்டை நிரப்பும் அவன் பால்யத்தின் படிமங்கள் திடீரென ஒருநாள் காணாமல் போவதன் அதிர்ச்சியும் பயமும் அப்படிமங்களின் அடிமனதில் என்றாவது தோன்றியிருக்குமா? சட்டென ஒருநாள் அவன் முகத்தில் மீசையைக்கண்ட அப்படிமங்களின் பேரதிர்ச்சியை நீங்கள் மொழியர்த்தறியாதவரை, தேடல் சார்ந்த உங்களின் முன்னெடுப்புகளை உங்கள் பதிவுகளும் அறிந்துகொள்ளாது.

உங்களுக்கான அடையாளங்களை கட்டமைக்கும் சமுதாயச் சதிவேலையில் அவை மும்முரங்கொண்டு இயங்குகின்றன. உங்கள் இருப்பு எதுவெனினும் அதன் முழுபரிமாணத்தை அறியாமல், குருடன் தடவிய குட்டிச்சுவராய் உங்களுக்கான அடையாளங்கள் நிறுவப்படுகின்றன. காலப்போக்கில் அதையே உங்கள் அடையாளங்களென நீங்களும் நம்பிவிடும் அபாயம் இருப்பதால், பதிவுக்கொலை செய்தாகவேண்டிய அவசியம் உங்களை வந்தடைந்து நாளாகிவிட்டது. எனினும் அதுவும் உங்கள் அடையாளத்தை நிலைநிறுத்தும் ஒரு படிமம் என நீங்கள் கொண்டாடி மகிழ்வதின் அறியாமையைக்கண்டு மனம் வருந்துகிறது அது.

நான் கண்டுகொண்டேன், இதோ முன்னெடுக்கிறேன். பிரதிகளை அழித்துவிட்டேன். என் பிரதிகளினூடாக உயிர்த்திருந்த உங்களின் அடையாளத்தொகுப்புகளையும் உங்கள் எதிர்வினை குறித்த எந்த கவலையுமின்றி அழித்துவிட்டேன். அவ்வப்போது அடையாளங்களை உதறுங்கள். அது உங்கள் உண்மையான சுயத்தை மீட்டெடுக்க உதவும். உங்கள் அடையாளங்களுக்கு வலுசேர்க்கும் விதமாய் நான் கிறுக்கிச்சென்ற தீர்மானங்களை உதறிவிடுங்கள். இனி என் வீடும் முற்றமும் படிமங்களும் புதுப்பொலிவு கொண்டுஇயங்கலாம் அல்லது அடையாளப்படுத்தப்படுதலின் கட்டாயங்களின்றி நிம்மதியாய் திரியலாம்.

உங்களை நீங்களே சிதைத்து கொல்லுகையில், அந்நிகழ்வின் நினைவுகளோ பாதிப்புகளோ இன்றி இயல்பாய் நிகழ்த்திவிடுங்கள். கட்டுடைத்தலை திட்டமிட்டு செய்யவியலாது என்பதை அறியாதவரா நீங்கள்?